Bonifatius episcopus servus servorum dei venerabilibus fratribus . . patriarchae Gradensi et . . archiepiscopo Pragensi ac dilecto filio . . praeposito ecclesiae sancti Severi in Erfordia Maguntinensis diocesis salutem et apostolicam benedictionem! Exhibita nobis pro parte dilectorum filiorum . . abbatis et conventus monasterii Sanctae Coronae Cistertiensis ordinis Pragensis diocesis petitio continebat, quod olim ipsi in causa per eos contra dilectum filium Johannem Benessij praepositum ecclesiae sancti Petri Wissegradensis prope Pragam super eo, quod dudum ipsi in pacifica possessione vel quasi de Perfritz, de Seldnaw, de Purgstal, de Sunnenberg, de Hintringe, de Schonaw, de Walterstift, de Freudental, de Abruslage, de Pukkendrem, de Cristanstift, de Pleschem, de Ditrichstift, de Lenczenrid, de Pulkenstift, de Schriferstift, de Huncznusch, de Janastift, de Czwictma, de Blasestift, de Swanestift et de Ebenaw villarum in dicta diocesi consistentium, ac agrorum, terrarum, silvarum, pascuorum, piscinarum, aquarum decursuum, piscationum et bonorum aliorum immobilium ac possessionum de pertinentiis villarum huiusmodi existentium etiam infra eandem diocesim, nec non iure patronatus ecclesiarum parrochialium et capellarum in eisdem villis consistentium ac praesentandi rectores ad ecclesias et capellas huiusmodi ac etiam inquirendi, corrigendi et puniendi excessus, qui per personas laicales in dictis villis pro tempore degentes committuntur, nec non mero et mixto imperio in villas et personas laicales huiusmodi, ipsasque personas laicales mulctandi, et alias omnem iurisdictionem temporalem in eas exercendi existentes, bonae memoriae Theodericus archiepiscopus Magdeburgensis, tunc praepositus ecclesiae sancti Petri Wissegradensis prope Pragam, falso asserens huiusmodi villas cum aliis bonis et iuribus praedictis ad se ratione praepositurae praedictae ecclesiae pertinere, ipsos abbatem et conventum villis, agris, silvis, pascuis, piscinis, aquarum decursibus, piscationibus, bonis ac possessionibus, iure patronatus et praesentandi rectores, nec non inquirendi, corrigendi et puniendi ac mulctandi cum mero et mixto imperio ac iurisdictione huiusmodi exercendi contra iustitiam spoliaverat, illaque occupaverat ac detinuerat et detinebat indebite occupata, mota in palatio apostolico coram diversis auditoribus causarum palatii praedicti ex commissionibus apostolicis diutius ventilata, ac bonae memoriae Johannes patriarcha Aquilegensis tunc praepositus dictae ecclesiae primo, et deinde praefatus Johannes Benessij supradicto Theoderico in vitium successissent, tres pro eis et contra dictum Johannem Benessij, per quas dicti abbas et conventus ad possessionem dictarum villarum cum aliis bonis et iuribus huiusmodi restituti et reintegrati, ac idem Johannes Benessij in fructibus ex dictis villis cum aliis bonis et iuribus supradictis citra perceptis et in expensis in eadem causa factis condemnatus fuerunt, diffinitivas sententias reportarunt, et super executione sententiarum ac restitutione fructuum et expensarum huiusmodi, quae quidem expensae ad certas florenorum auri summas taxatae fuerant, nostras ad vos sub certa forma litteras impetravit. Cum autem sicut eadem petitio subiungebat, huiusmodi lite tunc indecisa pendente dilectus filius Dunowetz de Boemia armiger praefatae diocesis in nonnullis ex villis et aliis bonis ac iuribus huiusmodi se intruserit, illaque occupaverit ac detinuerit et detineat indebite occupata, ipsique abbas et conventus dubitent, ne etiam aliqui alii in eisdem villis et aliis bonis ac iuribus huiusmodi vel aliquibus eorum iam forsan se intruserint vel imposterum intrudant, pro parte ipsorum abbatis et conventus nobis fuit humiliter supplicatum; ut eis providere super praemissis de oportuno remedio dignaremur. Nos igitur huiusmodi supplicationibus inclinati discretioni vestrae per apostolica scripta mandamus, quatinus vos vel duo aut unus vestrum per vos vel alium seu alios ad executionem praedictarum sententiarum tam contra praefatum armigerum et alios quoscunque in dictis villis ac aliis bonis et iuribus vel eorum aliquibus iam forsan intrusos vel imposterum intrudendos perinde quoad possessionem duntaxat villarum et aliorum bonorum et iurium dictis abbati et conventui tradendam auctoritate nostra procedatis, ac si dictae sententiae contra eos latae forent, et nichilominus legitimis super hiis habitis et habendis servatis processibus eosdem processus quotiens expedierit, aggravare curetis, contradictores per censuram ecclesiasticam appellatione postposita compescendo, invocato ad hoc si opus fuerit auxilio brachii secularis, non obstante si praefato armigero vel quibusvis aliis communiter vel divisim a sede apostolica sit indultum, quod interdici, suspendi vel excommunicari non possint per litteras apostolicas, non facientes plenam et expressam ac de verbo ad verbum de indulto huiusmodi mentionem. Datum Romae apud sanctum Petrum IIII. Idus Januarii, pontificatus nostri anno sexto.||
Auf dem Umbug links: Duplicata. E. Wynans.||
Unter dem Umbug rechts: Jan. x Franciscus. Ja. de||
Bononia. Auf der Rückseite: J. H. Cruse.

Source Fulltext: PANGERL, Goldenkron (=FRA II/37, Wien 1872) S. 278-280