Wenceslaus dei gratia Romanorum rex semper augustus et Boemiae rex. Notum facimus tenore praesentium universis, quod pro parte honorabilis et religiosorum . . abbatis et conventus monasterii Sanctae Coronae devotorum nostrorum dilectorum maiestati nostrae exstitit propositum cum querela, qualiter quidam abbas dicti monasterii, praedecessor abbatis praesentis, omnes et singulas devolutiones in civitate sua Netolicz ac ad ipsos abbatem et conventum tanquam veros et legitimos eiusdem civitatis dominos tam de iure quam antiqua et laudabili consuetudine pertinentes alienaverit et dicti loci civibus vendiderit ac in eosdem transtulerit cum effectu, in dicti monasterii notabile praeiudicium et gravamen, propter quod maiestati nostrae pro parte praedictorum abbatis et conventus extat humiliter supplicatum, quatenus praefatam alienationem et venditionem, praesertim cum sine nostra et praedecessorum nostrorum regum Boemiae consensu et confirmatioiie facta fore dicatur, annullare, revocare et cassare auctoritate regia dignaremur. Nos attendentes quod delictum personae in dampnum ecclesiae redundare non debeat, praefatas alienationes et venditiones sicut praemittitur factas, animo deliberato et de certa nostra scientia, nec non auctoritate regia Boemiae, si et in quantum dictis abbati et monasterio nocivae existunt, et per nos vel praedecessores nostros Boemiae reges confirmatae ut praefertur non fuerint, penitus et in toto cassavimus, revocavimus et annullavimus, cassamus, revocamus et tenore praesentium annullamus, volentes easdem de cetero nullius fore roboris vel momenti. Praesentium sub regiae nostrae maiestatis sigillo testimonio litterarum. Datum Pragae anno domini millesimo trecentesimo nonagesimo quinto, in vigilia nativitatis Christi, ||
||
regnorum nostrorum anno Boemiae tricesimo tertio, Romanorum vero vicesimo.||
Auf dem Umbug: Ad relationem Sigismundi subcamerarii||
Wenceslaus de Olomuncz.||
Auf der Rückseite: R(egistrata), Petrus de Wischow.

Source Fulltext: PANGERL, Goldenkron (=FRA II/37, Wien 1872) S. 304-305