Ich Larentz von Vruar¹ vergich an disem prief und tvn chvnt allen den, die in sehent oder hornt lesen, umb den weingarten, den ich und mein hausvrowe Chvnigunde haben verchauffet, der da leit pei dem Gebling und haizzet die Leitten² und des fvmfthalb jevch sind, den gechauffet hat her Mathýas von Lintz der alt richter seinem ayden Pernolden hern Symons svn dez richter ze Ybs und seiner hausvrowen Katherei, umb hundert phvnt und umb acht und sibnzich phvnt phenning Winner mvinz, der wier gar vnd gaentz auch gewert sein. Daz ich vorgenanter Larentz dem vorgenanten Pernolt und seiner hausvrowen die vorgenant ist, gesatzet han mit guetlich willen, zv den zeiten do ich iz wol getvn mocht, ze ebentevr meinen weingarten an der Chremsleiten, der da heizzet die Zenoýmerinn³, zv einem scherm fuer alle ansprach, alz lang untz der vorgenanten mein hausvrowen chinder choment zv irn tagen, daz sev den vorgenanten weingarten der da heizzet die Leitten, wol auf geben mvegent vnd bestetigen mit perchmaister hant, und han auch in die vorgenanten ebentevr gesaczet mit perchmaister hant ledichlich und unuerchvmbert hern Rappotz dez Jegermaister zv den zeiten der herren pheleger (sic) von Agdenmvnde⁴, also mit bescheidener red, daz ich die vorgenant ebentevr nicht versetzen und verchvmbern schol, die weil die vorgenanten chinde meiner hausvrowen zv irn tagen nicht chomen sind als vorgeschriben ist. Und dor uber gib ich vorgenanter Larentz disen priff versigelt mit meinem insigel vnd der vorgenant perchmaister mit seinem insigel zv einem urchvnde und zv einem gezeug diser sach. Der prief ist geben, do von Christes gepurt worn ergangen drevzehen hvndert jar dor noch in dem nevnzehentem jar, an sand Veitz tag.

Source Fulltext: PANGERL, Goldenkron (=FRA II/37, Wien 1872) S. 72-73