Wir Jan von Mýchelsperk¹ bekennen offenlich in dissem pryeff, daz mein vetter tzo seligher gedechtnůs her Hainrich von Welesschin habt beseczet und gegeben den gaistlichen heren dem abt und dem conuent tzo der Heligher (sic) Croenen an seilgeraid in aller form und weys, als her na ist beschrieben: (Folgt der Wortlaut der Urkunde dd. Beneschau, 20. Jänner, 1350.) Nu is is koemen, das nach hern Hainrichs toed sein drey su^en her Beness, her Jesko und her Hainrich ir vaterlich erb getailt haben, und haben daz dorph Nessmien² in dei tailung genomen und daz geviel do hern Jesken in sein tail, do must ein itlicher ain trittail aus richten der samnung von den czehen marken. Do gab in her Beness daz dorph Smýrhaw³ vor sein tail, her Jesko gab in veirtehalb hube czo Nessmien und Hainrich gab in daz dorp Jakobskalein⁴, an (sic) her Jessko loset sein tail dar nach aus vor drey und dreisshik mark ain und czweinzik grozzen und vier haller. Nu is is auch dar nach koemen, daz di herschaf von Welesschin an uns erflich ist derstoruen, so hab wir myt gutem willen der egenanter samnung daz dorp Smýrhaw verkauft dem erberen ritter hern Marquart von Poresschin, und haben umb daz selb gelt und um daz, daz in von hern Jesken worten ist, wetervm von dem selben hern Marquard gekauft redlich und recht czwey dorpher, daz aine haiset Rabne, daz ander Ossowe⁵, und czo den paiten gehorent achthalb hub. Und haben si in gekauft mýt holtz, mit wesmut, mit waid und myt allem nu^ecz und herschaft, soem si her Marquart selbe inne ha^et gehabt, ewiglich an hindernyz czo haben und czo besiczen, und geluben, daz wir und uns (sic) erben eder (sic) unser nakumling di dorpher der samnu^eng vryhen und traulichen wellen beschermen, dar wir anders nycht von muten willen dan gotz gnad. Wir bekennen und verhaisen auch, daz si di maute czo Welesschin vrý und ledich schullen haben in aller weis als hý vor in hern Hainrichs prief ist beschrieben. Und daz disse dink alle stete und gancz pleiben, so hab wir czo voder unser insigel an dissen prief ghehangen, und haben gepeten den etelen heren hern Hainrich von Rosenperk und den vorgenanten hern Marquart von Porresschin, daz si czo aime geczeu^egnu^es auch ir insigel an dissen prief hanghen. Und wir Hainrich von Rosenperk und Marquart von Porreschin veriehen und bekennen, daz disse dink also geschehen sein, als vor ist geschreben, und haben des czo aime beczeu^egnu^es unser insigel an dissen prief gehangen, soem uns der etel her her Jan von Michelsperk dar um habt gepeten. Disser prief ist gegeben, do man czalt nach Christes gepurd dreuczehen hundert iar, und dar nach in dem czwe und neu^enczycstem iar, an sant Mathias tag des hailigen czwelpoten.

Source Fulltext: PANGERL, Goldenkron (=FRA II/37, Wien 1872) S. 204-206