Ego Marquardus miles dictus de Poresschin recognosco per praesentes, et universis publice notum facio, quod de bona voluntate et consensu filiorum et heredum meorum villas meas Rabne et Ossowe¹ dictas domino abbati et conventui monasterii Sanctae Coronae ordinis Cisterciensis pro villa eorum Smyrhaw dicta pleno iure et dominio tradidi et assignavi, sic quod nec ego nec quisquam heredum vel successorum meorum nunquam in eis quitquam iuris seu potestatis habere debeamus vel exercere, nec aliquo modo eas repostulare; pro berna tamen regali quotiens ipsa communiter per regnum Bohemiae transierit, solummodo unam sexagenam grossorum et non plus mihi et dictis meis heredibus vel successoribus de praefatis villis dare et expedire tenebuntur. Quod si facere neglexerint, tunc elapso termino desuper statuto et condicto simul habito possumus dictarum villarum incolas arrestare et impignorare tam diu, quousque de supradicta berna regali plene fuerit satisfactum, nullus tamen nostrum quitquam amplius praeter quam illam unam sexagenam pro una berna ab eis quandoque poterit extorquere. In cuius rei firmius testimonium praesentes litteras sigillo meo una cum sigillis Petri filii mei et Jeskonis dicti Borowytz, quibus pro hoc supplicavi, muniri feci et roborari. Datum anno domini millesimo trecentesimo nonagesimo secundo, in die beati Wencezlai martyris.

Source Fulltext: PANGERL, Goldenkron (=FRA II/37, Wien 1872) S. 206-207