Reverendissimo in Christo patri et domino domino Johanni miseratione divina patriarchae Aquilegensi olim praeposito ecclesiae Wissegradensis prope Pragam nec non Wilhelmo¹ postea de dicta praepositura proviso, onmibusque aliis et singulis quorum interest vel intererit et quos infrascriptum tangit negotium seu tangere poterit quomodolibet in futurum, quocunque nomine censeantur, Bertrandus dei et apostolicae sedis gratia episcopus Eugubinus sacri palatii apostolici causarum et causae ac partibus infrascriptis a domino nostro papa auditor specialiter deputatus salutem in domino et praesentibus fidem indubiam adhibere! Dudum felicis recordationis dominus Vrbanus papa sextus causam et causas, quae vertebatur, vertebantur seu verti et esse sperabantur inter religiosos viros dominos abbatem et conventum monasterii Sanctae Coronae ordinis Cisterciensis Pragensis diocesis ex parte una et dominum Johannem patriarcham tunc praepositum dictae Wissegradensis ecclesiae et praefatum Wilhelmum, cui expost de dicta praepositura provisum extiterat, de et super nonnullis villis, agris, pascuis, piscariis, silvis, molendinis, possessionibus, iurisdictionibus et rebus aliis in processu causae deductis et eorum occasione ex altera, primo venerabili et circumspecto viro domino Francisco Laudo de Venetiis utriusque iuris doctori apostolicae sedis cappellano et deinde reverendo in Christo patri domino Petro Gasconis legum doctori dictae sedis prothonotario ac sacri palatii apostolici causarum supradictis auditoribus successive commisit audiendas, decidendas et fine debito terminandas cum omnibus emergentiis, incidentiis, dependentiis et connexis. Quarum quidem commissionum vigore per praefatos dominos Franciscum Laudo et Petrum Gasconis prothonotarios et auditores et coram eis ad nonnullos actus iudiciales in causa et causis huiusmodi tam ad discreti viri magistri Theoderici de Puteo in Romana curia et praefatorum dominorum abbatis et conventus monasterii Sanctae Coronae Pragensis diocesis principalium quam ad quondam magistri Bartholini de Placentia in eadem curia et praefati reverendissimi patris domini Johannis nunc patriarchae tunc praepositi dictae ecclesiae Wissegradensis principalium praedictorum hinc inde procuratorum, de quorum mandatis in actis praesentis causae habitis legitime constabat et constat, rite et legitime processum, deinde vero praefatus felicis recordationis dominus Vrbanus papa sextus eidem domino Petro Gaseonis prothonotario et auditori quandam aliam in hac causa commissionis sive supplicationis cedulam per certum suum cursorem praesentari fecit huiusmodi sub tenore: ,Beatissime pater! Orta dudum materia quaestionis inter devotos vestros abbatem et conventum monasterii Sanctae Coronae ordinis Cisterciensis Pragensis diocesis sacrosanctae Romanae ecclesiae inmediate subiectos² et venerabilem virum dominum Johannem pro tunc praepositum ecclesiae Wissegradensis prope Pragam eidem Romanae ecclesiae etiam inmediate subiectos de et super spolio nonnullorum bonorum inmobilium, iurium et iurisdictionum in actis causae huiusmodi expressato et in causa legittime processo contra eundem dominum Johannem praepositum ad omnes terminos speciales usque ad apertionem remissionis de partibus reportatae, praefatus dominus Johannes per sanctitatem vestram ad ecclesiam Luthomislensem extitit promotus, de dictaque praepositura ad praesentationem illustrissimi domini Romanorum et Boemiae regis extitit provisum venerabili domino Wilhelmo infra pupillarem aetatem constituto, cum quo fuit per eandem sanctitatem vestram quoad ipsius praepositurae assecutionem canonicam super defectu aetatis dispensatum, et quia successit in vitium dicti spolii, fuit ex commissione sanctitatis vestrae de mandato venerabilis viri domini Petri Gasconis dictae causae auditoris ignorantis dictae aetatis defectum ad dictam causam una etiam cum capitulo dictae ecclesiae in partibus citatus, pro quo seu quibus nullus comparuit seu comparet, et quia dictus pupillus est, in dicta causa reus dubitatur, an processus continuatus et continuandus contra eundem et sententia ferenda in dicta causa, si eam ferri contingeret, cum quo ad ipsum modernum praepositum aliqua essent vel nulla. Cum autem, pater beatissime, dictus pupillus sit absens et per dictum dominum auditorem dari non possit curator propter eius absentiam, cumque omnia praeiudicialia in dicta causa sint servata et gesta contra dictum dominum Johannem praedecessorem et ipse usque ad apertionem rotuli remissionis causam defendendam nichilque restet in dicta causa fieri nisi concludere et sententiam ferri, cum dicta remissio tempore dicti moderni praepositi sit realiter aperta, ideo supplicatur vestrae beatudini pro parte dictorum abbatis et conventus ad parcendum laboribus et expensis dictarum partium, quatenus committere et mandare dignemini praefato domino auditori, quod in dicta causa perinde procedat ad conclusionem et sententiam et partibus praedictis iustitiam faciat, ac si dictus processus continuatus fuisset seu continuaretur et dicta citatio facta ac dicta sententia lata esset seu fieret, maiorem et legittimam in iudicio standi habentem aetatem ac decernere, quod praedicta omnia debitum sortiantur effectum, ac si dictus aetatis defectus non obstaret vel quod praefatus dominus Petrus auditor dicto pupillo licet absenti aliquem in Romana curia det in dicta causa curatorem, de quo eidem domino auditori videbitur, cum quo in dicta causa procedatur usque ad sententiam et sententias quascunque in dicta causa ferendas inclusive, et quod omnia cum dicto curatore sic dato seu dando facienda perinde iuris sortiantur effectum, ac si dictus curator dicto pupillo praesenti et petenti datus esset iuribus et aliis in contrarium facientibus, non obstantibus quibuscunque, quibus in hac parte ex certa scientia dignemini derogare.‘ In fine vero dictae commissionis sive supplicationis cedulae scripta erant de alia manu et litera superiori literae ipsius cedulae penitus et omnino dissimili et diversa haec alia videlicet: ,De mandato domini nostri papae det idem auditor curatorem ad litem et iustitiam faciat‘ Cuius quidem commissionis vigore per praefatum dominum Petrum Gasconis prothonotarium et auditorem supradicto Wilhelmo minoris aetatis existenti provido et discreto viro magistro Bernardo de Pisis in Romana curia procuratori pro curatore ad litem et causam huiusmodi dato seu deputato, prout in literis intimationis sive instrumento publico ipsius domini Petri prothonotarii et auditoris desuper confectis suoque sigillo impendente sigillato et ad partes decreto plenius continetur. Postmodum vero praefato felicis recordationis domino Vrbano papa sexto prout altissimo placuit, vita functo et sanctissimo in Christo patre et domino nostro domino Bonifacio divina providentia papa nono et moderno ad apicem summi apostolatus assumpto, idem dominus noster Bonifacius papa nonus praefato domino Petro Gasconis prothonotario et auditori quandam aliam in hac causa commissionis sive supplicationis cedulam praesentari fecit in haec verba: ,Beatissime pater! Pridem lite pendente in palatio causarum apostolico inter venerabiles et religiosos viros dominos abbatem et conventum monasterii Sanctae Coronae Cisterciensis ordinis Pragensis diocesis ex una parte et dominum Johannem tunc praepositum ecclesiae Wissegradensis prope Pragam de et super nonnullis villis, agris, pascuis, piscariis, silvis, molendinis, possessionibus, iurisdictionibus et rebus aliis in processu litis et causae huiusmodi deductis et eorum occasione ex altera idem dominus Johannes tunc praepositus per felicis recordationis dominum Vrbanum papam sextum inmediate sanctitatis vestrae praedecessorem ad ecclesiam Luthomislensem fuit promotus, et cuidam Wilhelmo de dicta praepositura extitit provisum, contra quos singulariter et divisim et successive ad nonnullos actus est processum, citra tamen conclusionis statum causae huiusmodi sanctitas vestra habere dignetur hic pro sufficienti expressis, praedictusque Wilhelmus per contractum matrimonii etiam praeposituram praedictam dimisit et ab ea recessit, de ipsaque praepositura sic vacante cuidam Johanni domini Benessii est provisum, qui in vitium succedens sicut praedicti Johannes et Wilhelmus et quilibet eorum, ipsas villas et alia supradicta detinuerunt indebite occupata, sic et ipse Johannes praepositus modernus ipsa detinet occupata minus iuste in maximum dicti monasterii dampnum, praeiudicium et desolationem. Supplicat igitur ei sanctitati vestrae procurator et procuratorio nomine dictorum abbatis et conventus, quatenus causam et causas, quam et quas dicti domini abbas et conventus movent et inovere intendunt contra dominum Johannem Benessii novum praepositum nec non decanum, canonicos et capitulum ecclesiae Wissegradensis praedictae, omnesque alios et singulos sua interesse putantes de et super agris, pascuis, piscariis, silvis, molendinis, possessionibus, iuribus et iurisdictionibus et aliis supradictis et eorum occasione coniunctim et divisim, reverendo patri domino Petro Gasconis dicti sacri palatii causarum auditori, coram quo dicta causa pendet indecisa, committere dignemini audiendas, in statu debito resumendas, decidendas et fine debito terminandas, cum omnibus et singulis emergentiis, incidentiis, dependentiis et connexis, et cum potestate citandi dictos Johannem novum praepositum, decanum, canonicos et capitulum, omnesque alios et singulos sua interesse putantes, etiam si opus fuerit extra Romanam curiam et ad partes semel et pluries, totiens quotiens opus erit.‘ In fine vero dictae commissionis sive supplicationis cedulae scripta erant de alterius manus litera superiori literae ipsius cedulae penitus dissimili et diversa haec verba videlicet: ,De mandato domini nostri papae audiat idem auditor, resumat, citet, ut petitur et iustitiam faciat.‘ Qua quidem ultima commissione praefato domino Petro prothonotario et auditori praesentata, praelibatus dominus noster papa certis de causis huiusmodi causam et causas in eo statu, in quo coram eodem domino Petro prothonotario et auditore verterentur et penderent, nobis Bertrando episcopo et auditori praefato commisit resumendas et ulterius audiendas, decidendas et fine debito terminandas cum omnibus et singulis emergentiis, incidentiis, dependentiis et connexis. Cuius quidem commissionis nobis ut praefertur factae vigore causa et causis huiusmodi per nos debite resumptis et in eis ad nonnullos actus processo, deinde praefatis magistris Bertholino de Placentia procuratore et Bernardo de Pisis curatore de medio sublatis, postmodum vero videlicet die et hora inferius annotatis fuimus per discretum virum magistrum Ruthgerum Balhorn in Romana curia procuratorem nec non procuratorem et procuratorio nomine dictorum dominorum abbatis et conventus monasterii Sanctae Coronae principalium, prout de huiusmodi suae procurationis mandato in actis praesentis causae coram nobis habitis extitit plenarie facta fides, coram nobis personaliter constitutum cum instantia debita requisiti, quatenus mortem praefatorum magistrorum Bertholini procuratoris et Bernardi de Pisis curatoris nec non statum causae huiusmodi et litis coram nobis ut praefertur indecise pendentis vobis domino patriarchae olim praeposito et Wilhelmo superius nominatis intimare, insinuare et notificare et literas intimationis in forma debita decernere et concedere dignaremur. Nos igitur Bertrandus episcopus et auditor praefatus attendentes requisitionem huiusmodi fore iustam et consonam rationi, et quod iusta petentibus non est denegandus assensus, vobis domino . . patriarchae et Wilhelmo, omnibusque aliis et singulis quorum interest, intererit vel interesse poterit quomodolibet in futurum, mortem dictorum magistrorum Bertholini de Placentia procuratoris et Bernardi de Pisis curatoris, omniaque alia et singula suprascripta et huiusmodi litis pendentiam atque statum causae coram nobis indecise ut praefertur pendentis intimamus, insinuamus, notificamus et ad vestram et cuiuslibet vestrum ac eorum quorum interest notitiam deducimus et deduci volumus publice per praesentes, ne vos vel aliquis vestrum de praemissis omnibus et singulis praetendere in futurum ignorantiam et allegare possitis seu possit aliqualem, certificantes vos et quemlibet vestrum, vobisque nichilominus et cuilibet vestrum expresse praedicentes, quod postquam huiusmodi nostra intimatio per nos ut praefertur ad partes decrecta (sic, directa) exinde partibus extiterit legittime executa, comparuentibus (sic) sive non, nos nichilominus vel alter forsan loco nostri interim in causa et causis huiusmodi surrogandus auditor ad partis legittime comparentis instantiam in causa et causis huiusmodi ad ulteriora usque ad diffinitivam sententiam inclusive procedemus sive procedet iustitia mediante, vestrorum et cuiuslibet vestrum absentia seu contumacia in aliquo non obstante. In quorum omnium et singulorum testimonium atque fidem praesentes literas sive praesens publicum instrumentum huiusmodi nostram intimationem in se continentes seu continens exinde fieri et per Heinricum notarium publicum nostrumque et causae huiusmodi scribam infrascriptum subscribi et publicari mandavimus nostrique sigilli fecimus appensione muniri. Datum et actum Perusii in palatio causarum apostolico supradicto, in quo iura redduntur, nobis inibi mane hora causarum ad iura reddendum pro tribunali sedentibus sub anno domini millesimo trecentesimo nonagesimo tertio, indictione prima, die Veneris undecima mensis Julii, pontificatus sanctissimi in Christo patris et domini nostri domini Bonifacii papae noni anno quarto, praesentibus ibidem discretis viris magistris Martino Mutsken de Eyk et Theoderico de Monte notariis publicis, scribisque nostris, clericis Leodiensis et Traiectensis dioceseum, testibus ad praemissa vocatis specialiter et rogatis.||
Signum Tabellionatus||
Et ego Heinricus Senfteleben de Rochelicz clericus Merseburgensis diocesis, publicus apostolica et imperiali auctoritatibus notarius ac praefati reverendi in Christo patris et domini domini Bertrandi episcopi et auditoris huiusmodi causae coram eo scriba; praedictae intimationi, petitioni, eiusque decreto ac omnibus aliis et singulis suprascriptis dum sic ut praemittitur per ipsum dominum episcopum et auditorem ac coram eo fierent et agerentur, una cum praenominatis testibus praesens interfui, eaque omnia et singula sic fieri vidi et audivi, ideoque hoc praesens publicum instrumentum me aliis occupato negotiis per alium fideliter exinde confeci, publicavi et in hanc publicam formam redegi, ac signo, nomine et cognomine meis solitis una cum eiusdem domini episcopi et auditoris appensione sigilli consignavi, rogatus et requisitus in fidem et testimonium omnium et singulorum praemissorum.

Source Fulltext: PANGERL, Goldenkron (=FRA II/37, Wien 1872) S. 215-221