Nos Johannes praepositus ecclesiae sancti Petri Wissegradensis prope Pragam nullo medio ad Romanam ecclesiam pertinentis, cancellarius regni Boemiae, notum facimus tenore praesentium universis, quod nos matura deliberatione praehabita de et super omnibus et singulis perceptis et quae percipi poterant in et de bonis, super quibus honorabiles et religiosi viri abbas et conventus monasterii Sanctae Coronae ordinis Cisterciensis Pragensis diocesis nobis et principaliter praepositus dictae ecclesiae Wyssegradensis successivis temporibus existentibus lites et quaestiones moverunt, nec non expensis et impensis, in quibus nos Johannes praepositus dictis abbati et conventui fuimus et sumus condempnati, ac etiam quibusvis aliis quaestionibus emergentibus, incidentibus et connexis de alto et basso compromisimus et vigore praesentium compromittimus modo, iure et forma quibus melius (et) efficacius fieri potest et debet, in serenissimum principem et dominum dominum Wenceslaum Romanorum semper augustum et Boemiae regem tamquam in arbitrum, arbitratorem et amicabilem compositorem sub poena centum marcarum auri puri, quinquaginta marcas pro fisco seu camera dicti domini regis et quinquaginta marcas per partem non tenentem dictum arbitrium seu pronuncciationem dicti domini nostri regis parti tenenti irremissibiliter solvendarum, quodque dedimus et damus dicto domino nostro regi plenam et omnimodam potestatem super praemissis laudandi, pronuncciandi, arbitrandi et diffiniendi verbo vel in scriptis sine strepitu et figura iudicii, partibus vocatis vel non vocatis, praesentibus vel absentibus, aut una tamen praesente et alia absente, stando vel sedendo iuris ordine servato vel non servato seu obmisso, diebus feriatis vel non feriatis, ubi, quando et prout dicto domino nostro regi arbitro ut praescribitur videbitur expedire, promittimusque parere et obedire ipsius pronuncciationi ac pronunccianda et diffinienda per ipsum adimplere cum effectu et perpetuo grata et firma habere, tenere et inviolabiliter observare et non contravenire modo aliquo, directe vel indirecte, quovis colore quaesito seu causa, nec etiam cuiuscunque iuris canonici vel civilis beneficio aut auxilio uti, per quod seu quae dictum compromissum aut pronunccianda et diffinienda per dictum dominum nostrum regem argui possent vel infringi quovis modo, sed potius quaevis pronunccianda per dictum dominum regem emulgare et approbare sine mora. In cuius rei testimoniuni sigillum nostrum et praepositurae nostrae praesentibus est appensum. Acta sunt haec anno domini M^o CCC^o XCVI^o , feria sexta post festum sancti Ffrancisci videlicet sexta die mensis Octobris, indictione quarta, pontificatus sanctissimi in Christo patris et domini domini Bonifacii divina providentia papae noni anno septimo.

Source Fulltext: PANGERL, Goldenkron (=FRA II/37, Wien 1872) S. 305-306