Anno domini etc. LIX^o fferia quinta ante sancti Viti martyris et gloriosi patroni, quae erat dies XIIIIta Junii, reverendus pater et dominus dominus Paulus abbas monasterii Altivadensis Cisterciensis ordinis dispositione speciali magnifici et excellentis domini domini Johannis de Rosmberk capitanei Sleziae, coadiuncto sibi honorabili viro domino Johanne de Caplicz plebano in Miliczin¹, ad monasterium Sanctae Coronae eiusdem ordinis se transtulit differentias ibidem inter reverendum patrem dominum Gerhardum abbatem eiusdem monasterii una et alios fratres conventuales inibi parte ex altera exortas amicabiliter componendas. Primo autem de compvtatione seu ratione de singulis proventibus, quam ipse dominus abbas post visitationem novissime factam hucusque facere distulit, obtulit se ipse dominus abbas spontanee infra hinc et unum mensem proxime secuturum convocatis tribus aut quatuor fratribus senioribus debitam facere volens rationem in eorundem praesentia, dicens se et monasterium nullo penitus debito esse obligatum. Secundo quia de acceptione personarum aput eos quaestio et scissionis vertebatur materia, quae singula per edictum et amica(bi)lem concordiam transierunt hinc inde complanata, praeter quod infra hinc et terminum sancti Galli ipse dominus abbas diversis respectibus modum dare debet et ordinem, duos conversos puta Vlricum et Cristannum de monasterio am(m)ovendi. Casu autem quo tempore medio fortasse dominus abbas et conventuales habita prius matura deliberatione eos retinere vellent, ulterius attento quod ipsorum praesentia eidem monasterio, abbati et fratribus quippiam affere posset com(m)oditatis, pro quanto abbas et fratres conventuales votis in unum concurrerent et concordibus animis decrescerent, in eo utrimque persistant; sin autem dicti conversi omnino alienentur, ne ex ipsorum praesentia deteriora contingant. Tertio ipse dominus abbas in expensis competentibus fratres teneat pro facultate bonorum recuperatorum nec occasionem det fratribus de insufficientibus expensis murmurandi. Quarto ut ipse dominus abbas quantocius priorem substituat, qui monasterio, suae potestati, totique conventui magis ydoneus et utilis visus fuerit, et signanter si fieri potest, quem nominavimus, ut post cedet hoc in non mediocrem domini abbatis et monasterii com(m)oditatem et plures tollentur suspiciones. Quinto de conservatione sigilli conventualis teneatur ordo datus per dominum visitatorem, adiuncto quod is qui per abbatem requisitus fuerit ad dandam clavem pro recipiendo sigillo, sciat et videat quid sigillari debeat. Sexto et postremo de exteris Renensibus² sive aliis Theotunicis fratribus de novo recipiendis etc. visum est domino abbati Altivadensi et domino Johanni de Caplicz praescriptis, ut ipse dominus abbas Sanctae Coronae hiis prout modo stantibus propter pluralitateni fratrum praesentium a tali receptione exterorum fratrum abstineat, ne per novam receptionem ipsum monasterium, abbas et conventus graventur. Haec omnia suppra (sic) notata inviolabiliter et realiter cum effectu teneantur sine quavis renitentia. In et super hiis omnibus ffratres qui suspicioni dati fuerant, totusque conventus se filiali obedientia submiserunt ipsi domino abbati, veniamque petierunt humili prece, idemque dominus abbas more pii et benignissimi patris omnia pure propter deum gratiosissime indulsit, ea ipsis nullo umquam tempore, quovis quaesito colore ad ultionem replicans, tali conditione adiecta ut quando fratribus de cetero talia non (sic) occurant, sub castigatione poenarum et censurarum ab ordine et regula seu statutis et alia quavis dispositione clarius expressatis sine omni misericordia infligendi (sint). Pro quanto eis omnia et singula supprascripta per abbatem tenta fuerint, de cuius constantia minime dubitamus.

Source Fulltext: PANGERL, Goldenkron (=FRA II/37, Wien 1872) S. 496-498