Johannes dei gratia Boemiae et Poloniae rex ac Lucemb(urgensis) comes omnibus in perpetuum! Dignum est et iustum et consonum rationi, ut ea quae rite et rationabiliter et praecipue in animarum suffragium facta fuerint, per principem roborentur, etsi quando super hiis favor dominantis requiritur, hunc liberaliter largiatur. Eatenus ad universorum tam praesentium quam futurorum notitiam deducimus per praesentes, quod cum olim quondam fidelis noster dilectus Bawarus de Bawarow specialem habens devotionem, gratiam et favorem ad monasterium de Sancta Corona Cysterciensis ordinis, religiosis viris abbati et conventui eiusdem monasterii ac ipsi monasterio pro remedio animae suae quaedam bona dederit, quae in littera sua super eo scripta plenius. sunt expressa, quam devotus noster dilectus Theodericus abbas ipsius monasterii de Sancta Corona ad nostram veniens praesentiam nobis exhibuit, petens humiliter et attente, ut donationi praedictae nostram benignum praeberemus assensum, eamque ratificare et confirmare de benignitate solita dignaremur. Tenor autem ipsius litterae, quem de verbo ad verbum ad cautelam praesentibus inseri fecimus, per omnia talis est: (Folgt der Wortlaut oben genannter Urkunde. Die Namen der geschenkten Güter sind darin geschrieben: Swinicz, Krzidel, Zusni, Moynen, Zalticz, Schirnicz.) Nos quoque praedicti abbatis devotis precibus et intentis supplicationibus inclinati, donationem de praedictis bonis praedictis abbati et conventui ac monasterio de Sancta Corona per praedictum quondam Bawarum de Bawarow factam gratam habentes et ratam, eam ratificamus, approbamus et regiae auctoritatis nostrae patrocinio confirmamus. In cuius rei testimonium praesentes litteras fieri et sigillis maiestatis nostrae iussimus communiri. Datum Pragae per manus honorabilis Johannis Pragensis, Olomucensis et Wissegradensis ecclesiarum canonici, prothonotarii nostri dilecti, V^o Nonas Julii, anno domini millesimo trecentesimo octavo decimo, regnorum vero nostrorum anno octavo.

Source Fulltext: PANGERL, Goldenkron (=FRA II/37, Wien 1872) S. 69-70