Wenceslaus dei gratia Romanorum rex semper augustus et Boemiae rex. Notum facimus tenore praesentium universis, quod de probatae fidei, legalitatis et circumspectionis industria nobilis Henrici de Rosemberg¹ consiliarii nostri fidelis dilecti plenam et indubitatam fiduciam obtinentes, sibi non per errorem aut improvide sed animo deliberato et ex certa scientia tuitionem et gubernationem religiosorum abbatis et conventus monasterii Sanctae Coronae devotorum nostrorum dilectorum, nec non omnium villarum, praediorum, possessionum, hominum et bonorum ipsorum conmisimus et regia auctoritate Boemiae conmittimus plenarie per praesentes, ipsumque verum et legittimum tutorem eiusdem monasterii Sanctae Coronae nec non omnium bonorum ipsius ponimus et constituimus loco nostri, taliter videlieet ut idem Henricus dictum monasterium cum universis et singulis bonis, villis, praediis, possessionibus et aliis pertinentiis quibuslibet in suam tuitionem et gubernationem assumere, ipsumque tam in personis quam etiam in rebus et pertinentiis huiusmodi ab omnibus iniuriis, violentiis, dampnis et oppressionibus personarum quarumcunque, cuiuscunque etiam status, dignitatis vel praeeminentiae existentium, auctoritate nostra quam sibi praesentium vigore concedimus, tueri, gubernare² ac fideliter et efficaciter debeat defensare. Praesentium sub regiae nostrae maiestatis sigillo testimonio litterarum. Datum in Montibus Chuttenn anno domini millesimo quadringentesimo primo, die vicesima secunda Octobris, regnorum nostrorum anno Boemiae tricesimo nono, Romanorum vero vicesimo sexto.||
Auf dem Umbug: Per d. W. patriarcham Anth. cancellarium Wenceslaus archidiaconus Bechinensis.

Source Fulltext: PANGERL, Goldenkron (=FRA II/37, Wien 1872) S. 330-331