WIR Fridreich von gots gnaden Römischer kunig, zu allen zeiten merer des reichs, herczog zu Osterreich, zu Steir, zu Kernden und zu Krain, graue zu Tirol etc. bekennen, als unser lieber vetter kunig Albrecht loblicher gedechtnuss, ee er kunig ist worden, den erbern geistlichen unsern lieben andechtigen . . dem abbt und conuent zu der Guldein Kron den kauff des hausz zu Krembs gelegen, das ettwenn nach Loben des Juden daselbs ist gewesen¹, so si von dem abbt und conuent zu Wittingaw kaufft habent, mit seim brieue bestett hat, das mit seiner zugehörung aller vordrung frey innzuhaben und irs gotshauss pauwein darinne zuuertun und zuuerkauffen nach allen irn notdurfften und damit zu hanndeln und ze tun, als mit anderm des obgenanten irs gotshaus gut an alle irrung und hindernusz; desselben unsers vettern brieue si aber verlorn haben, als uns ist fürbracht, daz wir dem abbt und conuent daselbs zu der Guldein Kron desselben unsers vettern briefe und die obgemelten gnad, so er in geben und getan hat, von fleissiger bete wegen und von sundern gnaden auch bestett haben, geben und bestetten in die auch wissenntlich mit dem brieue hinfur ze haben, ze niessen und zu geprauchen, als oben gemelt ist, doch vncz an unser widerruffen angeuerde. Dauon gepieten wir unsern lieben getrewn . . dem richtter und rate zu Krembs, daz si die obgenanten abbt und conuent bey den obberürtten gnaden und freiheiten und diser unserr bestettung beleiben lassen und si dawider nicht beswern, irren noch hindern, noch des yemand anderm ze tun gestatten in dhain weg, doch nur uncz auf unser widerruffen als vorstet. Das mainen wir. Mit urkund des briefs, geben zu Paden an phincztag vor dem heiligen phingstag, nach Cristi gepurde im vierczehenhundertisten und vierunduierczigisten jare, unsers reichs im fünften jare.||
Auf dem Umbug links: Commissio propria domini regis in consilio.

Source Fulltext: PANGERL, Goldenkron (=FRA II/37, Wien 1872) S. 443-444