Georgius dei gratia Bohemiae rex, Moraviae marchio, Lucemburgensis et Silesiae dux ac Lusatiae marchio ad perpetuam rei memoriam! Summi immortalisque dei pietate regni nostri solio praesidentes inter curas praecipuas sanctissimis locis illius honorem dignum deferre nos oportet, cumque sacrae aedes plurime diversis invictissimorum Christi militum et coelicivium titulis illustrentur, nos tamen eum locum, qui a divo Othakaro praedecessore nostro fundatus est sub titulo triumphatricis coronae, quam ille coelorum rex cum hoste bellaturus humano in die triumphi pro nobis portavit, pia venerantes devotione ut et regnum nostrum protectione illius galeae salutaris armatum victrices semper palmasque de hostibus felices reportet conservarev et iura illius confirmare regia clementia reddimur proniores. Accedens igitur maiestatis nostrae praesentiam honorabilis Gerhardus abbas monasterii Sanctae Coronae ordinis Cisterciensis Pragensis dioecsis noster devotus dilectus suo et totius conventus nomine humiliter supplicavit, quatenus omnes gratias, libertates, donationes, iura et privilegia universa praefato monasterio a felicis memoriae regibus praedecessoribus nostris data, donata et concessa approbare, ratificare et confirmare dignaremur, et praesertim privilegium praefati Othakari per divos Karolum et Wenceslaum praedecessores nostros confirmatum, cuius tenor sequitur in haec verba: (Folgt die Urkunde K. Wenzels IV. ddo. Bürglitz, 18. Juni, 1384 - und erscheinen die Namen der Urkunde vom Jahre 1263 darin also wiedergegeben: Obschi - Tyeschin - Korenatecz - Clopotin - Chremeschin - Wu°dika - Bapotscha - Vtrnob - Psilepin - Buleb et Huba - Nacleti -Huzzni - Crenow - Claden - Zahorn - Kyaw - Radisch etc.) Nos eius iustis et rationabilibus annuentes precibus non per errorem aut improvide sed animo deliberato, sano procerum et fidelium nostrorum accedente consilio de certa nostra scientia auctoritate regia omnes et singulas gratias, libertates, donationes, privilegia et iura universa a divis praedecessoribus nostris Bohemiae regibus praefato monasterio concessa, donata, data, et confirmata ac si eorum tenores de verbo ad verbum his litteris insererentur, praefatum quoque privilegium ut praemittitur in omnibus suis punctis, articulis, clausulis et sententiis nec non et gratias, quas divus Ladislaus praedecessor noster de bonis monasterii restituendis, reluendis et amplius non inscribendis eidem monasterio concessit,¹ acceptamus, ratificamus et confirmamus, decernentes et volentes omnia et singula in eorum privilegiis et iuribus contenta perpetuae firmitatis robur inviolabile obtinere. Nulli ergo liceat hanc paginam nostrarum acceptationis, ratificationis, confirmationis, decreti et inhibitionis infringere vel ei ausu temerario contraire. Si quis autem contradictor huius repertus fuerit, ultra poenas in privilegiis eorum contentas poenam pro arbitrio nostro et successorum nostrorum infligendam se noverit incursurum. Praesentium sub appensione nostri regalis sigilli testimonio litterarum. Datum Pragae die vigesima quarta Septembris, anno domini millesimo quadringentesimo sexagesimo, regni nostri anno tertio.||
Auf dem Umbug links: Ad mandatum domini regis Procopius de Rabenstein cancellarius.||
Auf der Rückseite: Registrata. Jacobus de Cadano.

Source Fulltext: PANGERL, Goldenkron (=FRA II/37, Wien 1872) S. 504-505