Nos fratres Gerhardus abbas et prior Johannes ac Geblynus celerarius, totusque conventus monasterii ad Sanctam Coronam ordinis Cisterciensis dyocesis Pragensis notum facimus tenore praesentium universis, quod discretus vir dilectus noster Swathomyr de Knyn¹ nunc residens in curia dicta Petri² prope, opidum Netholicz, quam a nobis et a nostro monasterio jure emphiteosi possidet, coram nobis personaliter constitutus publice recognovit, qualiter ipse non inprovide sed maturo suorum amicorum consilio super eo habito honestae matronae Byethae uxori suae legittimae et ipsius nomine discretis viris domino Hostislao de Chrumpnaw plebano et Andreae fratribus eius de Bylsk³ quadraginta sexagenas grossorum Pragensium denariorum pro dote seu nomine dotalitii super praefata curia dicti Petri et omnibus pratis, agris, silvis ac aliis bonis mobilibus et immobilibus ad eum et ad ipsam curiam universaliter idivisim (sic, indivisim) pertinentibus dederit, donaverit, vere et iuste demonstraverit eadem bona eidem uxori suae et nomine ipsius fratribus suis praedictis pro praescriptis quadraginta sexagenis coram nobis voluntarie resignans sub conditionibus infrascriptis. Ita videlicet quod si Bietha praescripta eo migrante ex hoc seculo supervixerit, tunc quadraginta sexagenas praenarratas in bonis iamdictis ipsa vel ipsius fratres praedicti debent omnimode obtinere, eadem bona praefata Byetha aut eius fratres pro saepedictis quadraginta sexagenis grossorum post unum annum mortis Swathomyry, si nullus amicorum pro utilitate puerorum ipsius ea exsolverit, poterit dare, vendere, alienare jure emphiteosi et permutare, uni tamen rustico homini vel civili, in qua venditione nullus fratrum amicorum vel etiam pueri praefati Swathomiry debet vel debent eam aut eos quoquo modo impedire sub observantia suae fidei et honoris. Si vero pro praefatis bonis in venditione eorumdem ultra quadraginta sexagenas praefatas quidquam resultaret, hoc aput pueros dicti Swathomyry debet remanere. Supplicavit etiam nobis Swahomyr antefatus humiliter et attente, quatenus donationis, demonstrationis et resignationis huiusmodi contractui consensum pariter et assensum adhibere benivolum dignaremur. Nos igitur ob ipsorum utrobique fidei et servitiorum meritis (sic, merita), quibus nobis adhaeserunt fideliter et adhaerere poterunt fidelius in futurum, animo deliberato et maturo consilio praefatas donationis et resignationis conditiones ratificamus et praesentibus approbamus, ea conditione notabiliter adiecta, quod quicunque praefatam Bietham vel fratres eius nomine ipsius in praefata haereditate habere et tenere nullo modo dignaremur, quod tunc ipsa aut praefati fratres eius mandato de venditione dictae curiae et hereditatis a nobis et a nostro monasterio peremptorie recepto, post ipsum nostrum mandatum elapso uno anno et die debet vel debent ipsam hereditatem seu curiam ut praedicitur rusticali homini vel civili vendere, dilatione qualibet postergata, salvis tamen circa hoc censibus, steuris, solutionibus et ceteris magnis vel parvis nostris iuribus nobis et nostro monasterio de ipsis bonis fieri debentibus seu consuetis. Harum testimonio litterarum quibus sigilla nostra cum sigillis praefati Swathomyry de Knyn, Zachariae de Truskowicz⁴ et Petri dicti Wyssnye de Wyetrzn⁵ de certa nostra scientia sunt appensa. Datum et actum anno domini millesimo trecentesimo septuagesimo octavo, dominica in vigilia Nicolay confessoris gloriosi.⁶

Source Fulltext: PANGERL, Goldenkron (=FRA II/37, Wien 1872) S. 153-155