Petrus Gasconis legum doctor domini nostri papae prothonotarius et ipsius sacri palatii apostolici causarum et causae ac partibus infrascriptis ab eodem nostro domino papa auditor specialiter deputatus universis et singulis dominis abbatibus, prioribus, praepositis, decanis, archidiaconis, cantoribus, scolasticis, thezaurariis tam cathedralium quam collegiatarum canonicis, parrochialiumque ecclesiarum rectoribus et eorum loca tenentibus, presbyteris, capellanis, curatis et non curatis, vicariis perpetuis, notariis et thabelionibus publicis et clericis quibuscunque per civitatem et diocesim Pragensem ac alias ubilibet constitutis et eorum cuilibet in solidum, ad quem vel ad quos praesentes nostrae litterae pervenerint, salutem in domino et mandatis nostris ymmo verius apostolicis firmiter obedire! Dudum felicis recordationis dominus Vrbanus papa sextus quandam commissionis sive supplicationis cedulam nobis per certum suum cursorem praesentari fecit, quam nos cum ea qua decuit reverentia recepisse noveritis, tenorem qui sequitur continentem: ,Supplicat sanctitati vestrae procurator et procuratorio nomine venerabilium et religiosorum virorum dominorum abbatis et conventus monasterii ad Sanctam Coronam ordinis Cisterciensis Pragensis diocesis, quatenus omnes et singulas causas, quae pendebant indecisae coram venerabili viro domino Francisco de Laudo sacri palatii causarum auditore, inter praefatos dominos abbatem et conventum et eorum monasterium parte ex una et venerabilem virum domimim Johannem praepositum ecclesiae sancti Petri Wissegradensis prope Pragam de et super quibusdam villis, iuribus, iurisdictionibus et aliis in dicta causa deductis et eorum occasione ex altera, committere dignemini alicui alteri de dominis auditoribus vestri sacri palatii causarum resumendas in eo statu, in quo coram dicto domino Francisco ultimo remanserunt, qui se ad Romanam curiam (sic, a Romana curia) absentavit et de cuius reditu in brevi non speratur, nec non audiendas, decidendas et fine debito terminandas cum dependentiis, emergentiis, incidentiis et connexis‘ In fine vero dictae commissionis sive supplicationis cedulae scripta erant de alterius manus littera, superiori litterae ipsius cedulae penitus dissimili et diversa, haec verba videlicet: ,Audiat magister Petrus Gasconis et iustitiam faciat.‘ Cuius quidem commissionis vigore causa per nos legitime resumpta ac in eadem unacum dictis partibus in ipsa commissione nominatis ad nonnullos actus iudiciales circa causam (sic, causae) conclusionem per nos processo, ac deinde praelibato domino Vrbano papa sexto sicut altissimo placuit viam universae carnis ingresso, et sanctissimo in Christo patre et domino nostro Bonifacio divina providentia papa nono ad apicem summi apostolatus assumpto, idem dominus noster Bonifacius papa nonus quandam aliam commissionis sive supplicationis cedulam per certum suum cursorem praesentari fecit, cuius tenor talis: ,Beatissime pater! Pridem lite pendente in palatio causarum apostolico inter venerabiles et religiosos viros dominos abbatem et conventum monasterii Sanctae Coronae Cisterciensis ordinis Pragensis diocesis ex una parte et dominum Johannem tunc praepositum ecclesiae Vyssegradensis prope Pragam de et super nonnullis villis‘, agris, pascuis, piscariis, silvis, molendinis, possessionibus, iurisdictionibus et rebus aliis in processu litis et causae huiusmodi deductis et eorum occasione ex altera, idem dominus Johannes tunc praepositus per felicis recordationis dominum Vrbanum papam sextum immediatum sanctitatis vestrae praedecessorem ad ecclesiam Luthomislensem fuerit (sic, fuit) promotus et cuidam Wilhelmo de dicta praepositura extitit provisum, contra quos singulariter et divisim et successive ad nonnullos actus est processum circa tamen conclusionem, cuius statum causae huiusmodi sanctitas vestra halbere dignetur hic pro sufficienti expressum, praedictusque Wilhelmus per contractum matrimonii etiam praeposituram praedictam dimisit et ab ea recessit, de ipsaque praepositura sic vacante cuidam Johanni domini Benessii¹ est provisum, qui in vitium succedens, sicut praedicti Johannes et Wilhelmus et quilibet eorum ipsas villas et alia supradicta detinuerunt indebite occupata, sic et ipse Johannes praepositus modernus ipsa detinet occupata minus iuste in maximum dicti monasterii dampnum, praeiudicium et desolationem. Supplicat igitur eidem sanctitati vestrae procurator et procuratorio nomine dictorum abbatis et conventus, quatenus causam et causas, quam et quas domini abbas et conventus movent et movere intendunt contra dominum Johannem Benessii novum praepositum, nec non decanum, canonicos et capitulum ecclesiae Wissegradensis praedictos, omnesque alios et singulos sua interesse putantes de et super agris, pascuis, piscariis, silvis, molendinis, possessionibus, iuribus et iurisdictionibus et aliis supradictis et eorum occasione coniunctim et divisim, reverendo patri domino Petro Gasconis dicti sacri palatii causarum auditori, coram quo dicta causa pendet indecisa committere dignemini audiendas, in statu debito resumendas, decidendas et fine debito terminandas cum omnibus et singulis emergentiis, dependentiis et connexis, et cum potestate citandi dictos Johannem novum praepositum, decanum, canonicos et capitulum, omnesque alios et singulos sua interesse putantes, etiam si opus fuerit extra Romanam curiam et ad partes semel et pluries, totiens quotiens opus erit/ In dictae autem commissionis sive supplicationis cedulae fine scripta erant de alterius manus littera, superiori litterae ipsius cedulae penitus dissimili, videlicet haec verba: ,De mandato domini nostri papae audiat idem auditor, resumat, citet, ut petitur, et iustitiam faciat.‘ Post cuius quidem commissionis sive supplicationis cedulae praesentationem et receptionem nobis et per nos ut praemittitur, ultimo factas fuimus per discretum virum magistrum Cobellinum Johannis de Scoychouen (?) procuratorem venerabilium et religiosorum virorum dominorum abbatis et conventus monasterii Sanctae Coronae ordinis Cisterciensis Pragensis diocesis principalium in dicta commissione principaliter nominatorum, prout de suae procurationis mandato nobis legitime constabat atque constat, die et hora infrascriptis coram nobis iudicialiter constitutum cum instantia debita requisiti, quatenus sibi citationem extra Romanam curiam et ad partes contra et adversus honorabilem (sic, honorabiles) viros dominos Johannem praepositum, nec non decanum, canonicos et capitulum ecclesiae Wissegradensis ex adverso principales, etiam in dicta ultima commissione principaliter descriptos, ac omnes alios et singulos sua interesse credentes communiter vel divisim iuxta et secundum vim et formam et tenorem commissionis praescriptae nobis ut praemittitur ultimo factae et praesentatae decernere et concedere dignaremur. Nos igitur Petrus prothonotarius et auditor praefatus attendentes requisitionem huiusmodi fore iustam et consonam rationi, volentesque in causa et in causis huiusmodi procedere ac partibus ipsis dante domino iustitiam ministrare ut tenemur, vos omnes et singulos supradictos et vestrorum quemlibet in solidum auctoritate apostolica nobis in hac parte commissa primo et secundo et tertio peremptorie tenore praesentium requirimus et monemus, vobisque nihilominus et vestrum cuilibet in virtute factae (? sanctae) obedientiae et sub exeommunicationis poena, quam in vos et vestrum quemlibet canonica monitione praemissa pro nunc prout ex tunc ferimus in his scriptis, nisi feceritis quod mandamus, districte praecipiendo mandantes, quatenus infra sex dierum spatium, postquam pro parte dictorum dominorum abbatis et conventus principalium fueritis requisiti seu alter vestrum fuerit requisitus, quorum sex dierum duos pro primo, duos pro secundo et reliquos duos dies vobis universis et singulis supradictis pro tertio et peremptorio termino ac monitione canonica assignavimus, ita tamen quod in hiis exequendis alter vestrum alterum non expectet, nec unus pro alio se excuset, praefatos dominos Johannem praepositum, decanum et canonicos, omnesque alios et singulos sua interesse credentes communiter vel divisim in eorum propriis personis, si ipsorum praesentiam commode habere poteritis, alioquin in hospitiis habitationum suarum, si ad ea tutus pateat excessus, capitulum vero ecclesiae Wissegradensis praedictae ex adverso principales in loco suo capitulari, dum ibidem fuerit capitulariter congregatum, ipsumque et omnes et singulos praedictos in kathedrali Pragensi ac collegiata Wissegradensi ecclesiis praedictis, dum ibidem populi multitudo ad divina audienda vel alias congregata fuerit, aliisque ecclesiis et locis publicis, ubi, quando et quotiens expeditum fuerit et pro parte dictorum dominorum abbatis et conventus principalium fueritis requisiti seu alter vestrum fuerit requisitus ex parte nostra ymmo verius apostolica publice alta et intelligibili voce peremptorie citare curetis, quos nos etiam et horum quemlibet tenore praesentium sic citamus, quatenus sexagesima die post citationem nostram huiusmodi per vos vel per alterum vestrum eis factam immediate sequenti, si dies ipsa sexagesima iuridica fuerit et nos vel alius loco nostri forsan surrogandus auditor ad iura reddenda pro tribunali sederimus vel sederit, alioquin proxima die iuridica ex tunc immediate sequenti, qua nos vel praedictum forsan auditorem surrogandum Romae in palatio causarum apostolico, in quo iura redduntur, vel alibi ubi tunc forsan dominus noster papa cum sua curia residebit, mane hora causarum ad iura reddenda pro tribunali sedere contigerit, per se vel procuratorem seu procuratores suos ydoneos ad causam et causas huiusmodi sufficienter instruetos cum omnibus et singulis actis, litteris, instrumentis, privilegiis, iuribus et aliis munimentis suis ad causam seu causas huiusmodi facientibus seu eam et eas quomodolibet tangentibus et concernentibus compareant in iudicio legitime coram nobis vel praedicto forsan surrogando auditore, praefatis dominis abbati et conventui principalibus aut eorum legitimo procuratori de et super omnibus et singulis in praescripta nobis facta commissione contentis de iustitia responderi vel ac alias in causa et causis huiusmodi et omnes et singulos actus gradatim et successive et usque ad diffinitivam sententiam inclusive debitis et consuetis terminis et dilationibus praecedentibus ut moris est processuri et procedi visuri, aliasque dicturi, facturi, audituri, praecepturi, quod iustum fuerit et ordo dictaverit rationis certificatos, nihilominus eosdem citatos, quos nos etiam et eorum quemlibet tenore praesentium certificamus, quod sive dicto citationis termino ut praemissum est comparere curaverint sive non, in causa et causis huiusmodi ulterius prout iustum fuerit procedetur, dictorum citatorum absentia seu contumacia non obstantibus; diem vero citationis huiusmodi atque formam et quidquid in praemissis duxeritis faciendum, nobis per vestras patentes litteras aut instrumentum publicum harum seriem seu resignationem in se continentes seu continens remissis praesentibus fideliter intimare curetis. Absolutionem vero omnium et singulorum, qui praefatas nostras sententias seu earum aliquam incurrerint seu incurrerit, quoquo modo nobis vel superiori nostro tantummodo reservamus. In quorum omnium et singulorum fidem et testimonium praesentes nostrae citationis litteras seu praesens publicum instrumentum huiusmodi nostram citationem in se continens exinde fieri et per Bertoldum notarium publicum, nostrumque et huiusmodi causae coram nobis scribam infrascriptum subscribi et publicari mandavimus, nostrique sigilli fecimus appensione muniri. Datum et actum Romae aput sanctum Petrum in palatio causarum apostolico praedicto, in quo iura reddi solent, nobis inibi mane hora causarum ad iura reddenda in loco nostro solito pro tribunali sedentibus sub anno nativitatis domini millesimo trecentesimo nonagesimo, indictione tertia decima, die lunae tricesima prima mensis Januarii, pontificatus domini nostri Bonifacii papae praedicti anno primo, praesentibus ibidem discretis viris magistris Gerardo Mathiae de Aquis et Theodrico de Vbach notariis publicis, scribisque nostris, ac Gerardo de Dauentria (?) clericis Leodiensis, Colloniensis et Traiectensis dioceseum, testibus ad praemissa vocatis specialiter et rogatis. Et ego Bertoldus Cottmann de Messchede clericus Colloniensis diocesis publicus apostolica et imperiali auctoritatibus notarius, praelibatique reverendi in Christo patris domini Petri Gasconis prothonotarii et auditoris huiusmodi causae coram eo scriba, praedictae citationi, petitioni, eiusque decreto et concessioni ac omnibus aliis et singulis suprascriptis, dum sicut praemittitur per dictum dominum prothonotarium et auditorem ac coram ipso fierent et agerentur, una cum praenominatis testibus interfui, eaque omnia et singula supradicta sic fieri vidi et audivi ac in notam recepi, ideoque hoc praesens publicum instrumentum aliis occupatus negotiis per alium scriptum exinde confeci meque subscripsi, publicavi et in hanc publicam formam redegi, signumque meum una cum eiusdem domini prothonotarii (et) auditoris appensione sigilli praesentibus apposui consuetum, rogatus et requisitus in fidem et testimonium omnium praemissorum.

Source Fulltext: PANGERL, Goldenkron (=FRA II/37, Wien 1872) S. 190-195