Nos Arnoldus divina miseratione abbas, Adam prior, Tilmannus subprior, Johannes celerarius, Nicolaus hospitalensis, totusque conventus monasterii ad Sanctam Coronam ordinis Cisterciensis et dyocesis Pragensis publice tenore praesentium universis profitemur, quod in nostra constitutus praesentia honorabilis et discretus vir dominus Petrus plebanus ecclesiae in Chwalsyn asserens, quod piae memoriae Johannes sellator pratum suum proprium ecclesiae ibidem pro remedio animae suae legavit et donavit. Post aliquod tempus praedictus dominus Petrus a senioribus sufficienter informatus, quod praedictum pratum salva conscientia sua licite possidere non valeret, ex eo quod ad hereditatem nostri monasterii pertinet et praetactus Johannes a monasterio nostro illud pratum possedit iure emphiticeo, quod chawffrecht wlgariter nuncupatur, quapropter praefatus dominus Petrus una cum consensu nostro et voluntate nostra omnium supradictorum antedictum pratum vendidit discretis viris Jesconi protunc temporis iudici et Alwlino dicto Rubencz¹ ibidem civibus pro septem sexagenis grossorum monetae Pragensis eo iure tenendum, habendum, regendum, possidendum sicuti praenominatus Johannes habuit, tenuit, possedit. Pro quibus quidem pecuniis septem sexagenis grossorum Pragensis monetae, et etiam duas sexagenas grossorum de pecuniis ecclesiae superaddidit, sic quod pro summa universali videlicet novem sexagenis grossorum Pragensis monetae comparavit et emit antiphonarium sive librum matutinalem pro utilitate et honore ecclesiae praedictae. In cuius rei testimonium sigilla nostra praesentibus sunt appensa. Et insuper ad maiorem protestationem praescriptorum memoratus dominus Petrus sigillum suum et in maius testimonium honorabilis et discretorum virorum videlicet domini Hostislai plebani in Chrumpnaw et opidanorum ibidem in Chwalsin praesentibus sigilla disposuit appendenda. Datum anno domini millesimo trecentesimo nonagesimo, in die sancti Laurentii martyris.

Source Fulltext: PANGERL, Goldenkron (=FRA II/37, Wien 1872) S. 200-201