Coram venerabili viro domino Nicolao Puchnik, vicario in spiritualibus reverendissimi in Christo patris et domini domini Wolframi sanctae Pragensis ecclesiae archiepiscopi apostolicae sedis legati generali, personaliter constitutus providus vir Nicolaus dictus Kugel carnifex de Netholicz, non compulsus nec coactus, sed sponte et libere, sano et deliberato animo cupiens temporalia pro aeternis et transitoria pro perpetuis felici commercio commutare, pro remedio et salute patris et matris ac suae nec non progenitorum suorum ac omnium fidelium defunctorum animarum unam marcam census annui et perpetui gravem, pro sexaginta grossis et quatuor grossis computando, in, de et super domo sua, quae est sita inter domos videlicet Theodrici dicti Egrer ex una et Nicolai dicti Fraydenreich brasiatoris opidanorum ibidem in Netholicz parte ex altera, ac quadam curia dicta Leptacz sita prope opidum praedictum, in quorum (sic, quarum) quidem videlicet domus et curiae dictus Nicolaus carnifex existit possessione pacifica et quieta, domino Mathiae plebano ecclesiae suae et ipsius successoribus dedit, donavit, deputavit et pie assignavit divisim in duobus terminis videlicet sanctorum Galli et Georgii tollendam, levandam et percipiendam, promittens nichilominus praefatus Nicolaus carnifex per se, heredes et successores suos, praefatum dominum plebanum et ipsius successores in dicti census perceptione et levatione non impedire aut quovis modo perturbare sub excommunicationis poena, cui se, heredes et successores suos sponte et libere submisit. Praefatus vero dominus plebanus per se et successores suos ratione donationis praedictae promisit quatuor anniversaria in anno quolibet temporibus perpetue affuturis quibuslibet quatuor temporibus peragere, ubi de sero vigiliae novem lectionum sine laudibus cantabuntur, et in crastino quatuor missae defunctorum, videlicet una cantata et tres lectae, et hoc in ecclesia beatae Mariae virginis ibidem in Netolicz peragentur et celebrabuntur, quavis contradictione non obstante et hoc sub excommunicationis poena antedicta. Quo facto praefatus Nicolaus carnifex et dominus Blazko conventor fructuum ecclesiae ibidem in Netolicz in absentia domini plebani videlicet domini Mathiae petebant, omnia et singula superius descripta per dominum Nicolaum vicarium approbare, ratificare, auctorisare et auctoritate ordinaria confirmare, dictumque censum unius marcae praedictae ecclesiae et ipsius rectoribus perpetuo annectere, unire, applicare, inviscerare et incorporare. Et dominus Nicolaus Puchnik vicarius in spiritualibus antedictus considerans praemissa ex zelo devotionis procedere et in divini cultus (augmentum?) salubriter evenire, ad petitionem partium praescriptarum omnia et singula praescripta in suis punctis, clausulis et articulis approbavit, ratificavit et auctoritate ordinaria confirmavit, dictumque censum deinceps et in antea iuris ecclesiastici et non mundani decrevit reputandum. Acta sunt haec anno domini M^o CCCC^o primo, die XV. mensis Aprilis, praesentibus discretis viris Dominica de Budwais, Martino Hes de Chiss¹, notariis publicis et multis aliis fidedignis.

Source Fulltext: PANGERL, Goldenkron (=FRA II/37, Wien 1872) S. 326-327