Innocentius episcopus servus servorum dei dilectis filiis Stephano abbati et conventui monasterii in Sancta Corona ordinis Cisterciensis Pragensis diocesis salutem et apostolicam benedictionem. Justis petentium desideriis dignum est nos facilem praebere assensum et vota, quae a rationis tramite non discordant, effectu prosequente complere. Eapropter dilecti in domino filii vestris iustis postulationibus grato concurrentes assensu omnes libertates et immunitates a praedecessoribus nostris Romanis pontificibus sive per privilegia vel alias indulgentias vobis et monasterio praedicto concessas, nec non libertates et exemptiones secularium exactionum a regibus et principibus vel aliis Christi fidelibus rationabiliter vobis et eidem monasterio vestro indultas, ac monasterium praedictum cum pertinentiis suis, quod vos canonice proponitis adeptos, et personas vestras ac locum in quo divino estis obsequio mancipati, cum omnibus bonis, quae inpraesentiarum rationabiliter possidetis aut in futurum iustis modis praestante domino poteritis adipisci, sub beati Petri protectione suscipimus atque nostra, specialiter autem decimas, terras, domos, possessiones, vineas; grangias, piscarias, prata, pascua, nemora, silvas, ortus (hortos?), molendina et alia bona, sicut ea iuste possidetis et quiete, auctoritate vobis apostolica confirmamus et praesentis scripti patrocinio communismus. Nulli ergo omnino hominum liceat hanc paginam nostrae confirmationis et communitionis infringere vel ei ausu temerario contraire. Si quis autem hoc attemptare praesumpserit, indignationem omnipotentis dei et beatorum Petri et Pauli apostolorum eius se noverit incursurum. Datae Romae apud sanctum Petrum, Idus Martii, pontificatus nostri anno primo.||
Auf dem Umbug rechts: R^ta gratis.||
G. Stoter.||
Auf der Rückseite: Martinus.

Source Fulltext: PANGERL, Goldenkron (=FRA II/37, Wien 1872) S. 338-339