Wenceslaus Grurem canonicus ecclesiae Pragensis reverendissimi in Christo patris et domini domini Albici dei gratia archiepiscopi Pragensis apostolicae sedis legati vicarius in spiritualibus generalis tenore praesentium notum facimus universis, quod postquam coram nobis pro parte venerabilis et religiosorum virorum domini Adae abbatis et conventus monasterii Sanctae Coronae ordinis Cisterciensis Pragensis diocesis ex una, et domini Mathiae plebani ecclesiae in Netolicz parte ex altera fuisset expositum, qualiter super dissensione, quae inter dictas partes occasione certorum agrorum prope villam¹, quos nunc Chwalo laicus ibidem excolit, tenet et possidet, ab annis pluribus vertebatur, praemissis debitis tractatibus amicabilis intervenit concordia talis videlicet, quod agri praescripti sub dominio dictorum dominorum abbatis et conventus remaneant et debeant remanere aeviterne, ipsique domini abbas et conventus dicto domino plebano pro emendis et comparandis aliis agris pro eadem ecclesia sua sex sexagenas grossorum Pragensium denariorum dare et assignare debent, prout dederunt et assignaverunt. Qui plebanus pro eadem pecunia sex sexagenarum iunctis aliis septem sexagenis de summa decem sexagenarum grossorum praedictorum, sibi pro praeiudicio occasione erectionis primae missae ibidem in Netolicz per opidanos data, apud Mikssonem Czazar opidanum opidi praedicti in Netolicz certos agros cum quodam prato emit et comparavit; presiduis (sic, pro residuis) vero tribus sexagenis grossorum eorundem librum missalis (sic, missalem) pro memorata ecclesia in Netolicz debebit et tenebitur comparare, de quo faciendo sufficientem fecit fideiussoriam cautionem, prout nobis plena existit facta fides. Cum autem dicta concordia sit pro utilitate et comodo (sic) dictarum partium facta et praefato plebano et ecclesiae suae ex eadem sic debito satisfactum, supplicatum est nobis pro parte partium antedictarum, ut praescriptum contractum admittere, ipsumque approbare, ratificare, incorporare et ordinaria autoritate confirmare dignaremur. Nos informari volentes, an ex praescripta concordia utilitas et comodum dictis monasterio et ecclesiae in Netolicz proveniant, inquisitionetn super praemissis omnibus et singulis a testibus fidedignis cuiuslibet iuramento praecedente per honorabiles viros dominos in Striczicz et in Nyempczicz² ecclesiarum plebanis fieri fecimus diligentem. Et quia ex huiusmodi inquisitione comperimus ex praescripta concordia utilitatem et comodum, praescriptis monasterio et ecclesiae evomere (evenire ?), ideo supplicationibus nobis pro parte dictorum (sic, dictarum) partium tamquam iustis rationabilibus et iuri consonis favorabiliter annectentes (sic, annuentes), praescriptam concordiam prout sacra (sic, facta) existit et ut superius est descripta praesentibus admittentes, ipsam approbamus, ratificamus, auctorisamus et in dei nomine auctoritate ordinaria per praesentes confirmamus. In cuius rei testimonium praesentes litteras fieri et sigilli vicariatus archiepiscopatus Pragensis, quo ad praesens utimur, appensione iussimus communiri. Datum Pragae anno domini millesimo quadringentesimo tredecimo, die vicesima tertia mensis Junii.

Source Fulltext: PANGERL, Goldenkron (=FRA II/37, Wien 1872) S. 369-371