Frater Johannes abbas Cistercii in Cabilonensi dyocesi totius nostri Cisterciensis ordinis et capituli generalis plenaria fungentes potestate venerabili et in Christo nobis carissimo coabbati nostro monasterii nostri de Altovado salutem et iustitiae rectitudinem ministrare! Conquestus e(s)t nobis venerabilis coabbas noster monasterii Sanctae Coronae in inclito Bohemiae regno consistentis, venerabilem coabbatem nostrum monasterii de Zharz¹ eum et monasterium suum molestare et impetere super quadam summa octoginta aureorum olim cuidam praedecessori suo ut praetendit concessa, ad cuius solutionem dictus abbas Sanctae Coronae dicit se minime teneri seu obligari, iustitiae remedium humiliter implorando. Hinc est quod vobis, de cuius prudentia, discretione et fidelitate ad plenum confidimus, committentes damus auctoritatem citandi et convenientes dictas partes coram vobis ad competentem locum et diem et auditis audiendis visisque videndis et consideratis considerandis querelam istam in plenaria ordinis auctoritate consopiendi, invocato ad praemissa et ea tangentia quorumcunque judicum ecclesiasticorum seu potentum secularium auxilio, consilio et favore. omnibus igitur regularibus ordinis potissimum praefati monasterii personis firmiter damus in mandatis in virtute salutaris obedientiae et sub excommunicationis poena praecipientes, quatinus in omnibus et singulis praemissorum et ea tangentium vobis tanquam nobis humiliter pareant et devote obediant. Datum Cistercio (sic) sub appensione sigilli nostri, decima die mensis Decembris anno domini millesimo quadringentesimo nonagesimo.

Source Fulltext: PANGERL, Goldenkron (=FRA II/37, Wien 1872) S. 543-544