Ich Margret wyteb dez Heinreichs Choberleins emaln purger ze Pazsaw dem got genad, und Cristeyn ir payder tochter veryehen an dysem brief vor allen, dy in sehent oder horent lesen, daz wyr mit gesamter hant pey unsern trevn gelo^ebt haben, daz wyr dexn (sic) weyngarten, den wyr recht und redleich dem erbergen herren dem apt und dem conuent von der Heyligencron verkauft haben, der pey Crems in Osterreich liget, und daz Weynhaus¹ ist genant, iar und tak schvllen und wellen ausrichten von aller ||
ansprach, und darvm setz wir czephant als unser guet, daz wir haben in Payern oder in Osterreych an weyngerten order (sic) an andern digen (sic). Des ist gezeug ver Percht di vrau von Wynkel, und her Vlreich der phfarrer von Sent Stephan, her Gundaker der phfarrer und korher von Passaw, her Vlreich der richter und seyn sun Gundaker von Crems Nyclaz der Berner purger daselbst, Albrecht von Anyon und ander getrew leut genuch. Und daz ditz gulv^eb kraft hab und stet beleib, zo hab wir dysen prief geben zv eynem urku^end und wezeugung dyser diger (sic), versigelt mit dem insigel dez erberigen vorgenanten herren hern Gundakerz dez phfarrerz und korher dacz Pazsaw. Dytz ist geschehen, alz man czelt von Kristez gepurt dreuzehen hundert jar, dar nach in dem syben und dreisigsten jar, an dem suntak vor aller helygen tak.

Source Fulltext: PANGERL, Goldenkron (=FRA II/37, Wien 1872) S. 93-94