Nos Petrus de Janowicz¹ magister curiae serenissimi principis domini Wenczeslai Boemiae regis recongnoscimus tenore praesentium universis, quod causas, dissensiones et controversias, quae a retroactis temporibus inter venerabilem dominum Gerhardum abbatem monasterii ad Sanctam Coronam sacrae religionis ordinis fratrum sancti Bernhardi ab una, et discretos viros . . scabinos et . . juratos de Notolicz et eorum complices vertebantur ab altera, ipsis hincinde partibus ad nostrum evocatis auditorium causas ipsorum audivimus, audientesque dictos juratos et scabinos et eorum complices de Notolicz erga dictum dominum abbatem excessisse et se ad gratiam suam omnino dedisse. Nos multorum sapientum et fidedignorum habito consilio eidem domino abbati ad preces iamdictorum juratorum supplicavimus studiose, qui nostris precum benigne aquiescens instantiis ipsos recepit ad gratiam, et extunc ipsos mutuo concordavimus firma et amicabili concordiae unione; tali tamen conditione interserta, quod ipsi jurati et scabini cum suis complicibus ipsum dominum abbatem ac suos officiales huiusmodi viis et temptationibus non debeant nunquam ammodo attemptare. In cuius rei testimonium sigillum et sigilla nobilium dominorum Marquardi burgravii de Rosenberg² et Setiechonis burgravii in Crumpnaw³ praesentibus sunt appensa. Datum anno domini millesimo trecentesimo septuagesimo primo, XXVI^a die mensis Octobris.

Source Fulltext: PANGERL, Goldenkron (=FRA II/37, Wien 1872) S. 141