Aussen: Dem edlen vessten herrn Vlrich von Rosenberg zu Krummaw dd.||
Mein dienst, wisset voran der von Rosenberg, alls euch zu gueter mass wol wissenlich ist, das meinem vater saligen herr Hainrich dem Puechperger ain gult geben und verschriben ist worden auf der Guldeinkran, das mein vatter herr Hainrich der Puechperger ein guete zeit eingenomen hat, des mein vatter und wir im nach nachmalls geweltigklich von euch enthwert sein wider gut kunigklich brief, dy wir daruber haben. Wir haben euch auch meniger mal darumben geschriben und ainen tag mit euch gesuecht vor meinem genadigen herrn bischof Leonart etc. zu Passaw; daselbs hat mir und meinen bruedern von euch auch nit hat geteihen muegen, das pillichen gewesen war. Ir habet euch auch nach mall in recht begeben und verfangen gegen meinem brueder Burckhart dem Puechperger nach inhaltung ains anlas, der vor meines herrn (genaden) bischof Leonart etc. und sein genaden ratten ausgangen ist, dem auch ewrnthalben nit nach gangen ist wo(rd)en. Und haben das bisher weder durch tag noch durch recht nit haben bekomen künnden und habet uns das geweltigklich vor. Nu will ich das meinenthalben nit lenger ansten lassen und bitt euch, ir wellet mich hinder mein erb kumen lassen nach inhaltung, brief und sidel (sic), dy daruber verhannten sein, und den schaden kern, den ich sein genomen hab. Ob nit aber das je nit von euch wider gen mag oder kan, des ich je nit getraw, so solt ir lautter wissen, das ich meiner gueten herrn und frewnt. rat darinnen pflegen will und muesst, mir gein euch furnemen und bedrachten, damit ich meines erb von euch ein käm, des ich doch je nit gern tät und lieber vertragen war. Und beger darumben von euch einer verschribenen antwurt widerumben zu wissen. Geben zu Tuttling an pfincztag vor sand Erasmtag anno domini etc. LII. jar.||
Lasarus Puechperger zu Tuttling.

Source Fulltext: PANGERL, Goldenkron (=FRA II/37, Wien 1872) S. 478-479