Unser dinst czuuor! Lazarus! Als du uns yeczo geschriben hast, wie dein vatter ein gult gehabt hat auf der Gulden Kron, dauon deinen vatter und nachmalen ir von uns geweltikleichen entwert seit etc., auch in dem selbigen briefe mer berurst, wie du ein tag vor unsern gnedigen herrn seligen bissoff Leonarten mit uns besucht hast etc. als den derselbig dein brief mit mer worten innhelt. Nu sein wir auf das male nicht ingedenck, das du uns darumb ye geschriben solst haben, vermainst du uns aber daruber sprach nicht erlossen, so wellen wir uns gerne mit dir verhoren lassen vor unsern lieben herrn und frundt herrn Vlrich Nustorffer erwelten czu Passaw auch seinen rethen, doch unentgolten dem rechten so czwischen unser und deins bruders Purgkarthen ist. Wir hoffen auch, das du solhs unsers erbietens nicht abslachst, auch darauff uns noch den unsern keinen schaden czucziechst, und begeren darauff dein beschriben antwort bey dem poten, darnach wir uns wissen czu richten. Geben czu Bittingnaw am eritag nach der heiligen driweltikeit anno etc. LII^o.||
Vlrich.

Source Fulltext: PANGERL, Goldenkron (=FRA II/37, Wien 1872) S. 480