+ In nomine domini dei salvatoris ihesu cristi, temporibus domni mansonis gloriosi ducis et imperialis patricii anno octavo decimo, die prima mensis februarii, indictione quarta, amalfi. Certum est me sergio filius quondam stephani calendola a presenti die et pruntissima voluntate donavi et tradidi, et firmiter scrivere precavi vobis domno lupino filio quondam mauroni comitis, idest medietatem de ipse terre mee vacue de loco fonti, qui nobis et at niciforium germanum meum obbenerat per chartulam donationis ab urso filio lupini de erini; set postea quam nobis eos dedit suprascriptus ursus, tulit eos ipse episcopius de salerno et ego iam postea recollegi eos ab ipso episcopio de salerno cum meo expendio, et totum, quantum michi et at niciforium dedit suprascriptus ursus, venit in mea potestatem; modo vero de tote ipse sorte et silve quantum clamat ipsa chartula, quam nobis suprascriptus ursus fecit, medietatem vobis exinde dedimus et tradidimus sine minuitate, ut ab odierna die et in perpetuis temporibus vos et heredes vestri haveatis exinde medietatem, et nos medietatem, et vos de ipsa medietate vestra faciatis et iudicetis omnia que volueritis; et si ipso quod modo leontu relicta suprascripti ursi tenet in fonti, sive in vita sua, sive post mortem suam michi vel at meos heredes pervenerit, sicut per chartulam eos scriptum haveo a parte episcopii salernitani, medietatem exinde vos et vestri heredes havere deatis, quia medietatem nobis refudisti de ipso expensario, quod in ipso episcopio dedimus; et si ividem censum dederimus, nos et vos per medietatem ipsum censum dare deveamus, et iam aliquando exinde neque a me, neque ab heredibus meis, vel a nobis summissam personam nullam requesitionem exinde haveatis non vos non vestri heredes per nullum modum in perpetuum; et si quolivet tempore per quovis modum vel ingenium, sive nos aut heredes nostri, vos aut heredes vestros exinde querere aut contrare presumpserimus, quinquaginta bytianteos vobis componere promittimus, et ec chartula sit firma in perpetuum. + ego constantinus de mauro, de leupardu + ego taurus filius leonis de urso comitis rogatus scripsit a suprascripta persona +ego musco filius pulchari de gregorio comite interfui + sergius filius pulchari de mauro comite testis sum + ego sergius filius pantaleonis de iohanne comite testis sum

Source Fulltext: Codex Diplomaticus Cavensis, vol. 2, 100-101, Estratto da ALIM