+ In nomine domini nostri Iesu Christi. Anno ab incarnatione eius millesimo septuagesimo primo et vicesimo nono anno principatus domni nostri Gisulfi gloriosi principis, mense ianuario nona indictione. Dum coram presentia domni Leonis reverentissimi abbatis monasterio Sancte et individue Trinitatis, quod construnctum est foris hanc Salernitanam civitatem in loco Mitiliano, essem ego Petrus iudex, Grusa filia quondam Iannacii Atrianensis, que uxor fuerat quondam Marini Atrianensis, et Grusa filia ipsorum Gruse et Marini, que est uxor Pardi filii Petri Atrianensis qui cognominatus est Caccabellus, dum una cum ille ipse Pardus adesset, omnipotentis domini et salbatoris nostri Iesu Christi inspiratione compulse, pro salutis anime earum, sicut eis congruum fuit, bona eorum voluntate, per convenientiam, per hanc cartulam, dum ydonei interessent homines, optulerunt in eodem monasterio integram quartam partem quam sibi clarificaverunt pertinere de tota ecclesia Sancti Iohannis, que construncta est in pertinentiis uius civitatis in monte qui dicitur Tilisino Lucaniense finibus, et de tota terra intra quam ipsa ecclesia construncta est, que est per hec fines: de una parte fine valle et inde vadit secus fine heredum quondam Constantini; de super parte fine via publica et revolvit per ipsa fine in ipsa ecclesia; de super parte fine serra que est a parte septemtrionis et exinde revolbente et descendente per fine heredum suprascripti Constantini et perexiente in ipsa ecclesia; et integram quartam partem de omnibus aliis rebus movilibus et inmovilibus eiusdem ecclesie Sancti Iohannis pertinentibus et cum omnibus intro habentibus cunctisque suis pertinentiis et cum vice de ipsa via et de aliis viis suis et cum simile portione de omnibus monuminibus ex eadem ecclesia et rebus et terra continentibus. ea ratione ut integrum illud quod ipse mater et filia in eodem monasterio optulerunt ut dictum est semper sit in potestate suprascripti domni abbatis et successorum eius et partibus suprascripti monasterii, et liceat ipsum domnum abbatem et suos successores et pars eiusdem monasterii de eo facere quod voluerint. et per convenientiam ipse mater et filia, Grusa et Grusa, guadiam per iussionem ipsius domni abbatis dederunt Iohanni monacho eiusdem monasterii pro ipsius monasterii parte et fideiussorem ei pro parte suprascripti monasterii posuerunt Maurum qui dicitur Pappacarbone filium quondam Marini Atrianensis, et per ipsam guadiam ipse mater et filia obligaverunt se et suos heredes semper defendere ipsi domno abbati et eius successoribus et partibus suprascripti monasterii integrum illud quod in eodem monasterio optulerunt ut dictum est ab omnibus hominibus et partibus; et prebuerunt licentiam ut, quando ipse domnus abbas et suos successores et pars ipsius monasterii voluerint, potestatem habeant illud per se defendere qualiter voluerint, cum omnibus muniminibus et rationibus quas de eo ostenderint. et si sicut superius scriptum est, ipse Grusa et Grusa, mater et filia, et earum heredes ipsi domno abbati et illius successoribus et partibus eiusdem monasterii non adimpleverint et suprascripta vel ex eis quicquam removere aut contradicere presumpserint, per ipsam guadiam obligaverunt se et suos heredes componere ipsi domno abbati et illius successoribus et partibus suprascripti monasteri centum auri solidos constantinatos. hec autem omnia suprascripta fecerunt ipse Grusa et Grusa, mater et filia, secundum legem et Romanorum consuetudinem. et ipse Pardus per convenientiam obligavit se suosque heredes, si suprascripta vel ex eis quicquam removere aut contradicere presumpserint, componere ipsi domno abbati et eius successoribus et partibus suprascripti monasterii centum auri solidos constantinatos. et ipse Pardus hec suprascripta fecit per semedipsum, quoniam illius etatis est cui tutoris aut curatoris auxilium non indiget. Et taliter tibi Iohanni notario scribere precepi. S. + Ego qui supra Petrus iudex. S.

Source Fulltext: Codex Diplomaticus Cavensis, vol. 09, 312-314, Estratto da ALIM