+ In nomine domini nostri Iesu Christi. Anno vero ab incarnatione eius millesimo septuagesimo secundo et tricesimo anno principatus domni nostri Gisulphi gloriosi principis, mense maio nona indictione. Dum in sacro Salernitano palatio coram presentia suprascripti domni nostri serenissimi et a Deo conserbati principis essem ego Petrus iudex et plures more solito circa eum essent fideles, inter quos aderat domnus Petrus gratia Dei abbas monasterii Sancti Archangeli Mychaelis, quod conditum est in finibus Lucanie pertinentie Cilenti, et ipse domnus benignissimus princeps, sicut ei placuit, sua voluntate, pro amore domini et salvatoris nostri Iesu Christi et salutis anime sue et anime domni Guaimarii invictissimi principis et ducis genitoris sui et per obsecrationem suprascripti domni abbatis, per hanc cartulam optulit in monasterio ipso Sancti Archangeli de terris pertinentibus sue reipuplice, que sunt in ipsis finibus Lucanie ubi Gulia dicitur, terram per fines et mensuras iusto passu hominis mensuratas: a parte septemtrionis finis res ecclesie Sancte Marie que da Gulia dicitur et recte mensuratos passus ducentos; a parte orientis finis suprascripti domni principis et passus trecentos viginti; a parte meridiei similiter finis ipsius domni principis et passus alios ducentos; a parte occidentis finis medio ribo qui discernit a rebus ecclesiæ Sancti Martini, que ibi propinquo sita est et recte prope eum intra ipsam terram mensuratos passus alios trecentos viginti, cum omnibus que intra ipsam terram per iamdictas fines et mensuras sunt cunctisque suis pertinentiis et cum vice de via sua. ea ratione ut semper sit in potestate iamdicti domni abbatis et successorum eius et partium suprascripti monasterii, et liceat ipsum domnum abbatem et successores eius et partes predicti monasterii de eo facere quod voluerint. et per convenientiam ipse domnus princeps sua voluntate obligavit se et partes suprascripte reipuplice semper defendere ipsi domno abbati et successoribus illius et partibus suprascripti monasterii integrum illud quod in ipso monasterio ut predictum est optulit ab omnibus hominibus, et ipse domnus princeps tribuit eidem domno abbati licentiam ut, quando ille et successores eius et pars ipsius monasterii voluerint, potestatem habeant illud per se defendere qualiter voluerint, cum omnibus muniminibus et rationibus quas de eo ostenderint. et si, sicut superius scriptum est, ipse domnus princeps et pars reipuplice ipsi domno abbati et successoribus illius et partibus suprascripti monasterii non adimpleverint et suprascripta vel ex eis quicquam remobere aut contradicere presumpserint, per convenientiam ipse domnus princeps obligavit se et partes reipuplice componere ipsi domno abbati et successoribus illius et partibus suprascripti monasterii centum auri solidos constantinatos et sicut superius scriptum est adimplere. Et taliter tibi Iohanni notario scribere precepi. S. + Ego qui supra Petrus iudex. S.

Source Fulltext: Codex Diplomaticus Cavensis, vol. 09, 329-331, Estratto da ALIM