ALEXANDER episcopus, servus servorum Dei, Ursoni venerabili abbati Sancti Benedicti siti in civitate Tarentina iuxta portam Taraneam suisque successoribus, regulariter futuris temporibus promotis, in perpetuum. Quotiens ea a nobis petuntur quae a iustitiae ratione non discrepant, libenter debemus annuere et concessionis atque confirmationis apostolicae auctoritatis talibus petitionibus inpertiri suffragium; unde, inclinati devotis precibus tuis, quibus miserationis nostrae clementiam humiliter supplicasti quatinus prenominatum monasterium, quod quidam Leucius in sua proprietate construxit et ab eodem in ipsa hereditate filio adoptato, ut ipse dicis et ut eius etiam scripta testantur, sub tutela apostolicae protectionis susciperemus, quia postulatio iusta videtur, iamdictum monasterium sub munimine apostolicae defensionis suscipimus et confirmamus sibi quicquit nunc iuste habet vel iuste deinceps acquisierit, tam immobilibus quam mobilibus, ecclesiis scilicet, castellis, villis, terris vel vineis seu quibuslibet possessionibus, ita ut non liceat cuiquam, magnae parvaeque persone, prenominatum locum inquietare vel abbatem ibi constituere, preter quem congregatio secundum regulam sancti Benedicti elegerint, vel aliquid eorum quae sui iuris sunt in aliud violenter transferre, salvo in omnibus huius sanctae Romane Ecclesiae privilegio et matronalis Ecclesiae episcopii et proprii episcopi iusta et canonica reverentia. sin vero illius civitatis archiepiscopus gratis consecrationem ecclesiarum et ordinationem clericorum noluerit impertiri, tunc liceat abbati vel monachis predicti monasterii apud quemcumque catholicum episcopum habere locum obtinendi hoc, ita tamen ut debitus honor et reverentia predicte matronalis Ecclesiae episcopii et sui episcopi in posterum non subtrahatur. si quis autem temerario ausu huius nostri privilegii statutum infregerit et admonitus non emendaverit, sciat se apostolicae excommunicationis vinculo innodandum. at vero qui pio intuitu custos et observator extiterit, perpetuae benedictionis habundantia repleatur. R BV Datum Lateranis decimo kalendas aprilis p[er manu]s Petri Sanctæ Romanæ Ecclesiæ presbiteri cardinalis ac bibliothecarii. Anno .X. pontificatus domni ALEXANDRI secundi papæ, dominicæ autem incarnationis millesimo septuagesimo .I. indicione .VIIII. B

Source Fulltext: Codex Diplomaticus Cavensis, vol. 09, 327-328, Estratto da ALIM