+ In nomine Domini nostri Iesu Christi. Anno ab incarnatione eius millesimo septuagesimo tertio et tricesimo primo anno principatus domni nostri Gisulfi gloriosi principis, mense iulio decima indictione. Dum coram presentia domni Leonis reverentissimi abbatis monasterio Sancte et individue Trinitatis, quod conditum est foris hanc Salernitanam civitatem in loco Mitiliano, essem ego Petrus iudex, Iohannes monachus qui non in aliquo monasterio sub quolibet abbate regulariter vibet, filius quondam Constantini Atrianensis qui Ioncatella dictus est, in eadem accedens presentia, sicut ei congruum fuit, sua voluntate, per convenientiam, per hanc cartulam, pro salutis sue anime optulit Domino et in eodem monasterio integram terram cum arbusto quam ei habere pertinet foris hanc predictam civitatem in loco Forma pertinentie Nucerie, quam dixit esse per fines et mensuras iusto passu hominis mensuratas: a parte meridiei fine media aqua que decurrit ab ipsa Forma et passus centum quadraginta quinque; a parte orientis fine media sepes et intro eam iuxta ipsam sepem mensurati passus quinquaginta octo; a parte septemtrionis et passus centum sexaginta duo; a parte occidentis et passus quadraginta octo, cum omnibus que intro eam sunt cunctisque suis pertinentiis et cum vice de via sua. ea ratione ut integrum illud, quod ipse Iohannes monachus Domino et in suprascripto monasterio ut dictum est optulit, semper sit in potestate eiusdem domni abbatis et successoribus eius et partibus suprascripti monasterii, et liceat ipsum domnum abbatem et suos successores et pars eiusdem monasterii de eo facere quod voluerint. et per convenientiam ipse Iohannes monachus pro parte suprascripti monasterii guadiam dedit Iohanni eiusdem monasterii monacho et ei fideiussorem pro ipsius monasterii parte posuit Sergium qui dicitur de Penta filium quondam Landolfi, et per ipsam guadiam ipse Iohannes monachus qui Ioncatella dicitur obligavit se et suos heredes semper defendere ipsi domno abbati et eius successoribus et partibus suprascripti monasterii integrum illud quod Domino et in suprascripto monasterii ut dictum est optulit ab omnibus hominibus et partibus; et tribuit licentiam ut, quando ipse domnus abbas et suos successores et pars eiusdem monasterii voluerint, potestatem habeant illud per se defendere qualiter voluerint, cum omnibus monuminibus et rationibus quas de eo ostenderint. et si sicut superius scriptum est ipse Iohannes monachus qui Ioncatella dictus est et suos heredes ipsi domno abbati et eius successoribus et partibus suprascripti monasterii non adimpleverint et suprascripta vel ex eis quicquam removere aut contradicere presumpserint, per convenientiam et per ipsam guadiam obligavit se et suos heredes componere ipsi domno abbati et eius successoribus et partibus suprascripti monasterii centum auri solidos constantinatos et sicut superius scriptum est adimplere. hec suprascripta fecit ipse Iohannes monachus per licentiam suprascripti domni abbatis et pro parte suprascripti monasterii coram mea presentia, dum ydonei interessent homines. Et taliter tibi Iohanni notario scribere precepi. S. + Ego qui supra Petrus iudex. S. + Ego Petrus notarius me subscripsi. S.

Source Fulltext: Codex Diplomaticus Cavensis, vol. 09, 379-380, Estratto da ALIM