Cartula scripta per ipsum Romoaldum notarium in anno dominice incarnationis millesimo septuagesimo secundo et tricesimo anno principatus ipsius domni nostri Gisulfi gloriosi principis, mense ianuario decima indictione. Quomodo ante Petrum iudicem ipse Adelarius coniunctus fuerat cum suprascripto Petro Astone et ipse Adelarius clarificaverat sibi pertinere unam peciam de terra vacua in loco Veteri in ipso monte qui Traverse dicitur, quam dixerat esse per fines: de una parte finis ipsius Petri et aliquantum finis Marii filii Guisonis; a parte occidentis finis terra quam ipse Adelarius ipsi Mario venditam habebat; de alia parte finis aliorum. et sicut ipsi Adelario congruum fuerat, sua voluntate, per convenientiam, per ipsam cartulam donaverat ipsi Petro integram suprascriptam peciam de terra per suprascriptas fines cum omnibus intro habentibus omnibusque suis pertinentiis. ea ratione ut semper esset in potestate ipsius Petri et heredum eius et liceret illum et eius heredes de eo facere quod vellent, sicut ipsa cartula continet in qua ipse Petrus iudex subscriptus est.

Source Fulltext: Codex Diplomaticus Cavensis, vol. 09, 353-354, Estratto da ALIM