+ In nomine domini nostri Iesu Christi. Anno vero ab incarnatione eius millesimo septuagesimo sexto et tricesimo quarto anno principatus domni nostri Gisulphi gloriosi principis, mense augusto tertiadecima indictione. Ante me Iohannem iudicem Iohannes et Romoaldus germani ac filii quondam Petri vicecomitis et Gumeltruda uxor ipsius Romoaldi ac filia quondam Landolfi coniuncti sunt cum Theodoro aurifice filio quondam Basilii aurificis et cum Leone filio quondam Elie Greci, et ipsi germani et predicta Gumeltruda clarificaverunt se comuniter habere terram cum vinea et pomis et vacuo foris hanc Salernitanam civitatem in loco Veteri, que est per fines et mensuras iusto passu hominis mensuratas: a parte orientis finis via publica et prope eam intra ipsam terram mensurati recte passus quadraginta nobem; a parte septemtrionis finis sicut media sepes discernit; a parte occidentis finis flubio qui Veteri dicitur, et prope eum intra ipsam terram recte mensurati passus duodecim et medium usque fortioribus ripis lapideis, et revolvit in parte ipsa occidentis iuxta ipsas ripas et iuxta ipsu flubium, et revolvit in parte meridiei secus ipsam flubium passus septuaginta duo et medium; ab ipsa parte meridiei passus viginti et unus et revovit in ipsa parte meridiei passibus duobus et revolvit in ipsa parte orientis sicut media sepes et limes discernit et coniungit in ipsa via priore fine. et ex eadem terra dixerunt medietatem pertinere ipsi Iohanni et de altera medietate quartam partem pertinere ipsi Gumeltrude per suum scriptum morgincap sibi datum ab ipso viro suo alia die illorum copulationis et reliquas tres partes pertinere ipsi Romoaldo; et volentes ipsi germani et Gumeltruda iamdictam terram comuniter venundare, ipsa Gumeltruda secundum quod in Langobardorum regum edicto de venditione mulierum cum viro suo adfixum est, notificavit illud duobus parentibus suis propinquis et in presentia ipsorum parentum et mea ipsa Gumeltruda violentiam se pati non reclamavit nisi bona voluntate sua ipsam quartam partem suam se dixit venundare, ut ab hoc die hoc quod vendiderit stabile debeat permanere et ego in ac cartula manus ponam, quam Iohannes scriba cum notitia parentum et mea scribit. et ideo ipsi Iohannes et Romoaldus et Gumeltruda, sicut eis congruum fuit, bona illorum voluntate per convenientiam, per hanc cartulam comuniter venundederunt ipsi Theodoro pro parte Marie uxoris sue et ipsi Leoni pro parte Theophanu uxoris sue, que sunt sorores ac filie quondam Basilii iudicis Grecorum, integram suprascriptam terram cum vinea et pomis et vacuo per iamdictas fines et mensuras, cum omnibus que intra eam sunt cunctisque suis pertinentiis et cum vice de ipsa via. ea ratione ut semper sit in potestate ipsarum sororum et ille et illarum heredes licentiam habeant de eo facere quod voluerint; et propter confirmationem huius venditionis ipsi venditores susceperunt ab ipsis Theodoro et Leone pro parte ipsarum uxorum suarum statutum pretium auri solidos centum decem quorum quisque habebat tarenos quattuor ex moneta Amalfitanorum in omni deliberatione. et per convenientiam ipsi venditores comuniter guadiam ipsis Theodoro et Leoni pro parte ipsarum uxorum suarum dederunt et fideiussorem eis pro illarum parte posuerunt Adelarium filium quondam Romoaldi et per ipsam guadiam ipsi venditores obligaverunt se et suos heredes semper defendere ipsis Marie et Theophanu et illarum heredibus integrum illud quod ipsis viris illarum sicut suprascriptum est venundederunt ab omnibus hominibus, et ipsi venditores tribuerunt licentiam ut, quando ipse sorores et illarum heredes voluerint, potestatem habeant illud per se defendere qualiter voluerint cum omnibus muniminibus et rationibus quas de eo ostenderint; et si sicut superius scriptum est ipsi Iohannes et Romoaldus et Gumeltruda et illarum heredes ipsis sororibus et illarum heredibus non adimpleverint et suprascripta vel ex eis quicquam remobere aut contradicere presumpserint, per ipsam guadiam ipsi venditores obligaverunt se et suos heredes componere ipsis sororibus et illarum heredibus centum auri solidos constantinatos et sicut superius scriptum est adimplere. suprascripta fecit ipsa Gumeltruda comuniter cum ipso viro suo et cum illius voluntate. Et taliter pro parte ipsius Theodori tibi Iohanni notario scribere precepi. S. + Ego qui supra Iohannes iudex.

Source Fulltext: Codex Diplomaticus Cavensis, vol. 10, 158-160, Estratto da ALIM