+ In nomine domini nostri Iesu Christi. Anno vero ab incarnatione eius millesimo septuagesimo sexto et tricesimo quarto anno principatus domni nostri Gisulphi gloriosi principis, mense iulio tertiadecima indictione. Dum coram presentia domni Leonis reverentissimi abbatis monasterii Sancte et individue Trinitatis, quod conditum est foris hanc Salernitanam civitatem in loco Metiliano, essem ego Petrus iudex cum aliis ydoneis hominibus, tunc in eandem presentia Tanda filia quondam Marini Atrianensis, que fuerat uxor quondam Iohannis Atrianensis qui dictus est Calbarusu, et Maurus filius ipsorum Tande et Iohannis clarificaverunt se habere terram cum insiteto et vacuo foris ac civitate in ipso loco Metiliano ubi Castaniola dicitur, que est per fines et mensuras iusto passu hominis mensuratas: de pede a parte orientis sunt passus quinquaginta quattuor; a parte septemtrionis finis terra cum insiteto pertinentia suprascripti monasterii et passus ducentos quadraginta quattuor; de capite a parte occidentis sunt passus triginta quattuor; a parte meridiei finis medio vallone. et sicut ipsis Tande et Mauro congruum fuit, bona illorum voluntate, per convenientiam, per hanc cartula venundederunt Salperto monacho pro parte monasterii Sancti Leonis, quod constructum est prope flubio Boneia ubi *** et Pristinum dicitur et pertinet cum omnibus rebus suis prefato monasterio Sancte Trinitatis, integram suprascriptam terram cum insiteto per iamdictas fines et mensuras cum omnibus que intra eam sunt cunctisque suis pertinentiis et cum vice de via sua extra integra sorte quam ex ea pertinuit quondam Sergio filio Leonis Campanini, que est per mensuras suprascripto passu mensuratas: ab ipsa parte septemtrionis passus septuaginta; a parte orientis passus quadraginta; a parte meridiei finis medio ipso vallone et passus septuaginta octo; a parte occidentis passus triginta septem, ut heredes ipsius Sergii ipsam sortem per iamdictas mensuras habeant in eo loco ubi nunc eam retinent cum vice de via sua. ea ratione ut integra suprascripta venditio qualiter supra legitur semper sit in potestate partium ipsius monasterii Sancti Leonis et licentiam habeat pars eiusdem monasterii de ea facere quod voluerit. necnon et ipsi mater et filius dixerunt ipsam sortem suprascripti Sergii de iamdicta terra obligatam esse ipsi Tande, et sicut eidem Tande placuit, per convenientiam tradidit ipsi Salperto pro parte suprascripti monasterii Sancti Leonis integram pertinentiam et obligationem quam ipsi Tande pertinuit et pertinet in ipsa et de ipsa sorte ipsius Sergii de suprascripta terra ad faciendum ex ipsa pertinentia et obligatione pars ipsius monasterii quod voluerit, et nullo tempore ipsa Tanda vel eius heredes dent solutionem heredibus ipsius Sergii ipsam sortem vel ex ea quocumque modo alienandi; et propter confirmationem huius venditionis ipsi mater et filius susceperunt ab ipso Salperto pro parte suprascripti monasterii statutum pretium auri solidos septuaginta, quorum quisque habebat tarenos quattuor ex moneta Amalfitanorum in omni deliberatione. et per convenientiam ipsi Tanda et Maurus secundum legem et consuetudinem illorum Romanorum guadiam ipsi Salperto pro parte ipsius monasterii Ssncti Leonis dederunt et fideiussorem ei pro ipsius monasterii parte posuerunt Ursum cognatum ipsius Mauri qui dicitur de Gemma filium quondam Iohannacii, et per ipsam guadiam ipsi mater et filius obligaverunt se et suos heredes semper defendere partibus ipsius monasterii Sancti Leonis integrum illud quod ipsi Salperto sicut suprascriptum est venundederunt ab omnibus hominibus, et tribuerunt licentiam ut, quando pars ipsius monasterii voluerint, potestatem habeant illud per se defendere qualiter voluerint cum omnibus muniminibus et rationibus quas de eo ostenderint. et si sicut superius scriptum est ipsi Tanda et Maurus et illorum heredes partibus ipsius monasterii Sancti Leonis non adimpleverint et suprascripta vel ex eis quicquam remobere aut contradicere presumpserint, per ipsam guadiam ipsi mater et filius obligaverunt se et suos heredes componere partibus suprascripti monasterii Sancti Leonis centum auri solidos constantinatos. Et taliter tibi Iohanni notario scribere precepi. S. + Ego qui supra Petrus iudex. S.

Source Fulltext: Codex Diplomaticus Cavensis, vol. 10, 155-157, Estratto da ALIM