+ In nomine domini nostri Iesu Christi. Anno ab incarnatione eius millesimo septuagesimo septimo et tricesimo quinto anno principatus domni nostri Gisulfi gloriosi principis, mense septembri quintadecima indictione. Ante me Iohannem iudicem Iohannes qui cognominatur Rascica filius quondam Lupeni et Manso filius quondam Leonis Sirrentini coniuncti sunt cum Iohanne monacho monastterii Sanctæ et individuæ Trinitatis quod constructum est foris hac civitate ubi nunc domnus Leo venerabilis abbas preest, et locus ubi ipsum monastterium situm est Metilianum vocatur et ipsi Iohannes et Manso clarificaverunt sibi pertinere duas partes de terra cum canneto et silboso et vacuo, quæ est foris hac civitate in loco Veteri propinquo litore maris per fines et mensuras iusto passu hominis mensuratas: a parte orientis est finis via et per eam mensurati passus triginta et quattuor et cubitum unum; a parte septemtrionis est finis terra suprascripti monastterii ... a parte occidentis est finis medius flubius qui Veteri dicitur et iuxta eum intra ipsam terram mensurati passus sexaginta et sex; a parte meridiei est finis ... duas partes pertinere sibi dixerunt sicut medius limes et murex lapidea discernit qualiter ascendit et coniungit se in priore fine. et sicut ipsi Iohanni filio Lupeni et Mansoni congruum fuit, sponte per convenientiam per hanc cartulam, dum ydonei interessent homines, tradiderunt ipsi Iohanni monacho pro parte suprascripti monastterii integras ipsas duas partes quas sibi superius pertinere clarificaverunt de suprascripta terra cum canneto et silboso et vacuo per suprascriptas fines et mensuras cum omnibus quæ intra ipsas duas partes sunt cunctisque earum pertinentiis et cum vice de suprascripta via et cum vice de via ...ginta et sex passibus usque mare. ea ratione ut totum et integrum hoc quod ipsi Iohannes et Manso ut dictum est vendiderunt semper sit in potestate suprascripti domni abbatis et successorum eius et partium ipsius monastterii, et ipse domnus abbas et successores eius et partes ipsius monastterii licentiam habeant de eo facere quod voluerint. et tribuit ipse Manso licentiam ut ipse domnus abbas et successores eius et partes ipsius monastterii et homines quos voluerint quotienscunque voluerint potestatem habeant in iscla cum canneto, quæ est super ipsis molinis in parte occidentis de qua sibi ipse Manso tertiam partem pertinere dixit, iusta ratione fodere et palos figere et alia ligna ponere et antepositiones et alias suas utilitates in e iusta ratione facere et habere qualiter voluerint. et propter confirmationem huius venditionis ipsi Iohannes et Manso dixerunt se suscepisse a parte ipsius monastterii solidos tarenorum centum triginta et quinque in omni deliberatione. verumtamen potestatem peragendi, de quo ipse Manso sicut suprascriptum est licentiam tribuit, habeant omni tempore ipse domnus abbas et successores eius et partes ipsius monastterii et homines quos voluerint in iamdicta iscla iuxta suprascriptorum molinorum arcaturiam. et per convenientiam ipsi Iohannes et Manso guadiam suprascripto Iohanni monacho pro parte ipsius monastterii dederunt et fideiussorem ei posuerunt Leonem qui cognominatur Tumacellus cognatum ipsius Mansonis ac filium quondam Constantini; et per ipsam guadiam obligaverunt se et suos heredes semper defendere ipsi domno abbati eiusque successoribus et partibus ipsius monastterii ab omnibus hominibus integrum illud quod sicut suprascriptum est vendiderunt. insuper et ipse Manso obligavit se et suos heredes semper defendere ipsi domno abbati eiusque successoribus et partibus ipsius monastterii licentiam quam sicut suprascriptum est tribuit et potestatem in predicta iscla ab omnibus hominibus; et tribuerunt licentiam ut, quotiens ipse domnus abbas et successores eius et partes ipsius monastterii voluerint, potestatem habeant suprascriptam venditionem ac licentiam et potestatem per se defendere qualiter voluerint cum omnibus muniminibus et rationibus quas de eo ostenderint. et si sicut superius scriptum est ipsi Iohannes et Manso et eorum heredes non adimpleverint et suprascripta vel ex eis quicquam removere aut contradicere presumpserint, per ipsam guadiam obligaverunt se et suos heredes componere ipsi domno abbati eiusque successoribus et partibus ipsius monastterii centum auri solidos constantinatos. Et taliter tibi Grimoaldo notario scribere precepi. S. + Ego qui super Iohannes iudex. + Ego Iohannes notarius me subscripsi. S. + Ego Petrus notarius me subscripsi. S.

Source Fulltext: Codex Diplomaticus Cavensis, vol. 10, 170-171, Estratto da ALIM