+ In nomine domini Dei eterni et salvatoris nostri Iesu Christi. Anno ab incarnatione eius millesimo octogesimo, temporibus domini nostri Robberti gloriosissimi ducis, mense septembri concurrente indictione quarta. Dum coram presentia domni Petri reverentissimi abbatis monasterii Sanctæ et individuæ Trinitatis quod conditum est foris hac Salernitana civitate in loco Metiliano essem ego Iohannes iudex cum aliis idoneis hominibus, inter quos affuerunt Petrus filius quondam Roccii clerici et Gemma uxor eius filia quondam Petri clerici, tunc in eandem presentia ipsa Gemma ostendit unum scriptum per Romoaldum notarium scriptum in anno septimodecimo principatus domni Gisulfi, mense nobembri duodecima indictione. Qualiter Maraldus filius quondam Ursi aurificis, ut habet casus humane fragilitatis egrotasset quamquam in lectulo iaceret viveret et recte loqueretur, per ipsum scriptum iudicii et dispositionis coram Sicone comite et iudice pro anima sua iudicaverat et disposuerat quid de rebus suis fieri debuisset et, inter alia quod iudicaverat et disposuerat, iudicaverat ut integram portionem suam de rebus foris hac civitate qualiter et quomodocumque pertinuerat ei habere in loco Cerbaricia et in loco Lirino a super et non longe a fluvio Lirino ubi lutifiguli cretam fodiunt et in latere montis Catabuli loci, qualiter a fluvio Boneia ascendit usque cilium magnum ipsius montis, cum portione sua de molinis et de eorum pertinentiis ibidem constructis in aqua que Stillanti dicitur et cum portione sua ipsius aque et totam portionem suam quam sibi pertinuerat habere in ecclesia Sancti Iohannis in loco Veteri constructam et in rebus stabilibus et mobilibus ipsi ecclesie pertinentibus, cum vice de viis suis et cum integra portione sua de muniminibus ex ipsis rebus et molinis et ecclesia pertinentibus, essem in potestate suprascripti Petri clerici generi sui filii quondam Tanselferii clerici et heredum eius et liceret illum et eius heredes de eo facere quod vellent, sicut ipsum scriptum continet, in quo ipse Sico iudex subscriptus est. Cum autem ipsum scriptum ostensum fuit, sicut ipsi Gemme congruum fuit, bona sua voluntate per hanc cartulam pro salute anime sue et anime suprascripti Petri clerici genitoris sui optulit in iamdicto monasterio Sancte Trinitatis integram suprascriptam portionem quam ipse Maraldus eidem Petro clerico iudicaverat de iamdicta ecclesia Sancti Iohannis et de omnibus rebus stabilibus et mobilibus ipsi ecclesie pertinentibus, quemammodum supradictum scriptum continet, cum omnibus que intra ipsam portionem sunt cunctisque suis pertinentiis et cum vice de viis suis et cum simile portione de muniminibus ex ipsa ecclesia et de ipsis rebus eius continentibus. ea ratione ut semper sit in potestate ipsius domni abbatis et successorum eius et partium suprascripti monasterii et liceat illum et successores eius et pars ipsius monasterii de eo facere quod voluerint. et per convenientiam ipsa Gemma, dum una secum esset ipse vir eius, guadiam dedit Petro sacerdoti et priori ipsius monasterii et fideiussorem ei pro ipsius monasterii parte posuit Constantinum filium quondam Marini, et per ipsam guadiam ipsa Gemma obligavit se et suos heredes semper defendere ipsi domno abbati et successoribus illius et partibus suprascripti monasterii integrum illud quod in ipso monasterio ut dictum est optulit ab omnibus hominibus et tribuit licentiam ut, quando ipse domnus abbas et successores eius et pars ipsius monasterii voluerint, potestatem habeant illud per se defendere qualiter voluerint cum omnibus muniminibus et rationibus quas de eo ostenderint; et si sicut superius scriptum est ipsa Gemma et suos heredes non adimpleverint et suprascripta vel ex eis quicquam remobere aut contradicere presumpserint, per convenientiam et per ipsam guadiam ipsa Gemma obligavit se et suos heredes componere ipsi domno abbati et successoribus illius et partibus suprascripti monasterii centum auri solidos constantinatos. verumtamen quoniam in latere ipsius montis Catabuli et coniunctum cum ipso flubio Boneia et in ipsam aquam que Stillanti dicitur partibus ipsius monasterii res et molina pertinet habere et in suprascriptam ecclesiam Sancti Iohannis et in rebus ipsius ecclesie pertinentibus per alia sua ratione portionem pertinet habere parti ipsius monasterii. suprascripta fecit ipsa Gemma secundum legem et consuetudinem Romanorum qua vivit, et ipse Petrus vir eius per convenientiam obligavit se et suos heredes, si suprascripta vel ex eis quicquam remobere aut contradicere presumpserint, componere ipsi domno abbati et successoribus illius et partibus suprascripti monasterii centum auri solidos constantinatos et quod suprascriptum est firmum permaneat. verumtamen quoniam ipse Constantinus fideiussor cognominatur Guaraniu. Et taliter tibi Iohanni notario scribere precepi. S. + Ego qui super Iohannes iudex.

Source Fulltext: Codex Diplomaticus Cavensis, vol. 10, 342-344, Estratto da ALIM