+ Signum manus Basilii fabri ferrarii. In nomine Patris, et Filii, et Spiritus Sancti. Ego suprascriptus Basilius venerandam et vivificam crucem propria manu signavi. Quoniam, dum adhuc inter vivos ageret Constantina mater mea spiritualis, accepi ab ea et abs te Ioanne eiusdem filio meoque spirituali fratre plantationem quam habebatis in loco ubi dicitur ad Palos, quam emistis ex me supradicto Basilio, ut vestro labore in bonum ordinem, ut decet, redigeretis; et (accepi) territorium incultum, quod ibi est, ut in eo plantationem facerem; et de praedicta plantatione quam a vobis accepi, ut vos haberetis duas portiones, et ego unam; et de plantatione quam ego feci, ut ipsam in aequalem partem divideremus; ac Christi gratia adiuvante, utrumque opus ad finem perduxi, et ad ordinem, qui decebat, redegi: nuper de propria nostra voluntate supradictam divisionem inter nos fecimus; ita scilicet, ut de maiori vinea una pars ad me pertineat, et, reliquae duae, quae septemtrionem spectant, ad te praedictum Ioannem. Similiter et plantationem, quam ego feci, ex aequo inter nos divisimus: et tibi obtigit pars quae meridiem spectat, iuxta possessionem Basilii presbyteri. Quapropter volo, ut huiusmodi divisio usque ad finem permaneat, sine ullius impedimento aut molestia; quod si contravenire proponam, declaro me non esse audiendum, immo propter praevaricationem venerandae et vivificae Crucis poenae nomine solvere tenear Fisco publico solidos sex et triginta, et nihilominus ratum ac firmum permaneat huius divisionis instrumentum a me factum in praesentia testium. Scriptum manu Nicolai notarii mense martio, indictione IV, anno 6559. + Ioannes presbyter SS. Deiparae testis. + Sergius filius presbyteri SS. Deiparae testis. + Leo filius presbyteri testis. + Nicolaus presbyter testis. + Sergius filius Euptacallis testis subscripsi.

Source Fulltext: Codex Diplomaticus Cavensis, vol. CDC.007, -, Estratto da ALIM