Universis presentes litteras visuris et audituris Hadewiis Dei gratia abbatissa ecclesie beate Marie in Capitolio Coloniensis cognoscere veritatem. Noveritis, quod constituti coram nobis Adam dictus de Vissenich miles, Methildis mater sua et Greta uxor ipsius de communi consensu et parili voluntate unum mansum terre arabilis puri allodii nostri situm in parochia de Vissenich in via, que dicitur strata Coloniensis, que strata transit quasi per medium ipsius mansi, quem idem Adam a nobis et ab ecclesia nostra tenuit, possedit et possidet iure feodi ad manus nostras supraportaverunt et resignaverunt. Et nos huiusmodi mansum ad petitionem ipsorum co[n]cessimus et per presentes concedimus Blize filie quondam Hermanni dicti Scherfkin militis bone memorie, ita quod dictus miles et sui heredes ipso non existente singulis annis quatuor marcas Coloniensium denariorum bonorum et legalium pondere et argento duodecim solidos pro qualibet marca computatis infra festum beati Martini hyemalis predicte Blize vel cui recipiendas commiserit, quo advixerit, de predicto manso persolvent et assignabunt Coloniam sub eorum periculis, laboribus et expensis. Quos quidem quatuor marcarum reditus dicta Bliza erga prefatum militem et suos heredes ad vite sue tempora et ad usus necessarios cum suis bonis legitime comperavit, prout dicte partes nobis retulerunt, nec aliqua sterilitas, hostilitas, incendium, vis, inhibitio sive casus cuiuscumque infortunii per Deum aut hominem seu homines contingentis dictum militem et suos heredes ab huiusmodi solucione modo predicto facienda poterit aliquatenus excusare hoc etiam adiecto, quod ipse miles vel heredes sui dictos agros sive mansum predictum seminabunt et perpetuum mansum in cultura decenti tenebunt suis laboribus et expensis, ita quod ipsa Bliza consequi valeat reditus quatuor marcarum predictos in bonis predictis tali adiecta conditione et pena, quod si dictus miles aut sui heredes predictos quatuor marcas infra dictum terminum seu tempus ipsi Blize non exsolverint cum effectu, quod idem mansus statim cadat extunc ipsi Blize et ipsa de eodem suam possit facere liberam voluntatem tamquam ufufructuaria (!) ad tempus vite sue sine alicuius contradictione salvo tamen nobis per omnia iure nostro, quod habemus in mansa predicta et nichilominus dictas quatuor marcas, a quarum solutione cessatum fuerit, infra tempus predictum requirere dicta Bliza poterit et requiret pro et hoc sibi viderit expedire. Cum autem ipsam Blizam mori contingerit, extunc idem mansus ad dictum militem vel ad suos heredes libere divolvetur tali etiam conditione et pena appositis, si idem miles aut heredes sui in solucione dictarum quatuor marcarum termino predicto negligentes exstiterint aut aliquo premissorum, quod extunc post sex septimanas eundem terminum immediate sequentes sine captione idem miles, uxor sua et liberi aut eius heredes per .. officialem Coloniensem pro tempore fuerit sine strepitu iudicii aut per alium iudicem competentem ad libitum ipsius Blize excommunicentur et excommunicati nuncientur circa hoc omnibus defensionibus et exceptionibus iuris et facti canonici et civilis penitus et expresse sublatis et reiectis, exclusis et renunciatis. Promisit etiam idem miles fide data, quod ipsam Blizam in dicto manso non inpedet per se vel per alios, si idem mansus ad ipsam Blizam ex solucionis negligencia divolvatur, alioquin excommunicabitur per .. officialem Coloniensem et excommunicatus denuncietur, ut est dictum. In cuius rei testimonium sigillum nostrum ad peticionem dictarum parcium hinc inde coram nobis omnia et singula premissa vera esse recognoscencium presentibus duximus apponendum. Nos autem Adam miles et Bliza predicti sub sigillo eiusdem venerabilis domine .. abbatisse premissa omnia et singula vera esse recognoscentes et nos ad ea et eorum quodlibet obligasse ac renunciantes pure et simpliciter omni dolo et fraude, propriis sigillis carentes venerabilis viri domini .. officialis curie Coloniensis necnon discretorum virorum magistri Theoderici scolastici ecclesie sancti Georgii Coloniensis, Gerardi et Johannis militum dictorum Scherfkin, Theoderici dicti Raze ac Johannis nati quondam Hermanni vicecomitis scabini Coloniensis sigilla exhabundanti pro nobis presentibus apponi impetravimus in testimonium omnium premissorum nosque .. officialis curie Coloniensis, magister Theodericus scolasticus ecclesie sancti Georgii Coloniensis, Gerardus et Johannes milites, Theodericus ac Johannes scabini Colonienses predicti fatemus nos ad instantem peticionem predictarum partium sigilla nostra in testimonium premissorum presentibus appendisse. Actum et datum anno Domini M CC LXXX sexto in die beati Johannis ante portam Latinam presentibus Johanne cappellano domine .. abbatisse predicte, Gerardo et Johanne militibus dictis Scherfkin, Theoderico dicto Raze et Johanne nato quondam Hermanni vicecomitis prefatis, vasalli domine .. abbatisse prefate, Thilmanno de Drancgasse, Arnoldo de Oppendorp et aliis fidediginis (!).