In nomine domini amen.Chunradus dei gratia prepositus et conventus sancti Magni ecclesie Ripensis Ratispone universis presentia inspecturis :I salutem in eo qui salus omnium est et vita. In robur subsequentium notum esse cupimus presentibus et futuris, quod cum area contigua cymiterio hospitalis in fine vacaret a quibusdam cognomine Ziehaer respitientes necessitatem ipsius hospitalis magis propter premium eternum, quam propter rei cuiusquam emolumentum eam concessimus hospitali ad censum X denariorum annuatim inde in festo sancti Emmerammi et in nativitate domini pullum unum nostre ecclesie persolvendum ad terminum trium personarum, magistrorum videlicet hospitalis, fratris Volscalci et duorum sibi singulariter succedentium possidendam. Huius rei testes sunt: Heinricus, Herbordus, sacerdotes ecclesie beati Magni, Heinricus magister, Chunradus sacerdos in hospitali, Egelolfus, Vlricus, Chunradus, Geroldus fratres hospitalis, Heinricus der Scherzer, Levtwinus der Grezer, Vlricus Stravz, Fridericus Breuis, Otto Zwenel et alii quam plures. Ut autem hec nostra concessio rata permaneat, hospitali memorato per predictorum tempora personarum cartulam hanc concessionis eiusdem continentem seriem sigillo nostro placuit confirmari. Actum anno domini M CCo XLII indictione XV. Datum II. non. maii.