Innocentius episcopus servus servorum dei universis Christi fidelibus per Ratisponen(sem), Salzeburgen(sem) et Frisingen(sem) civitates et dioceses consti- :│ tutis salutem et apostolicam benedictionem. Quoniam, ut ait apostulus, omnes stabimus ante tribunal Christi 1) recepturi, prout in corpore gessimus, sive bonum 1) fuerit sive malum 1), oportet nos diem messionis extreme misericordie operibus prevenire ac eternorum intuitu seminare in terris, quod reddente domino cum multiplicato fructu recolligere debeamus in celis firmam spem fiduciamque tenentes, quoniam, qui parce seminat, parce et metet et, qui seminat in benedictionibus, de benedictionibus et metet 2) vitam eternam. Cum igitur, sicut dilecti filii, magister et fratres hospitalis sancte Katerine Ratisponen(sis), sua nobis insinuatione monstrarunt, ipsius hospitalis redditus et proventus adeo sint tenues et exiles, quod nec ipsi nec alii peregrinantes pauperes et infirmi, quos in eodem hospitali frequenter intuitu caritatis recipiunt, ex ipsis valeant nisi per subventionem fidelium sustentari. Nos credentes animabus vestris fructuosum existere, si manum illis porrexeritis caritatis, universitatem vestram rogamus, monemus et hortamur in domino vobis in remissionem peccaminum iniungentes, quatinus de bonis a deo vobis collatis pias elemosinas et grata eis caritatis subsidia erogetis, ut per subventionem vestram tam ipsorum, quam aliorum pauperum illuc confluentium inopie consulatur et vos per hec et alia bona, que domino inspirante feceritis ad eterne possitis felicitatis gaudia pervenire. Nos enim de omnipotentis dei misericordia et beatorum Petri et Pauli apostolorum eius auctoritate confisi omnibus vere penitentibus et confessis, qui eis manum porrexerint caritatis, decem dies de iniuncta sibi penitentia misericorditer relaxamus. Has autem litteras mitti per questuarios districtius inhibemus eas, si secus actum fuerit, carere viribus decernentes. Datum Lugdun(um) IIII. nonas Maii, pontificatus nostri anno tertio.

Source Fulltext: König, Stefan, Die älteren Urkunden des St. Katharinenspitals in Regensburg (2003), Nr. 39, S. 153 - 154.