In nomine domini amen. Albertus miseratione divina Ratispon(ensis) episcopus :│ universis presentia inspecturis salutem in eo, qui salus omnium est et vita. Quod sine deo nichil est validum, probant inoppinati exitus eorum, que provisa in bonum exitum contrarium sortiuntur. In cuius rei exemplum trahimus unionem hospitalis in ponte Ratispo(n)e ac ecclesie sancti Magni, quam fiducia utriusque loci profectus perpetui feceramus in honorem dei precipue, quod ipse solus occultorum cognitor deus novit. Quam nostram plantationem quod deus rigare atque ad incrementum perducere non curavit, patet ex defectibus irrecuperabilibus, qui ex ea utrique loco visibiliter et sensibiliter evenerunt. Igitur intentionem nostram semper ad beneplacitum dei, quantum ipse concesserit, directuri, licet circa eandem unionem bona fuerit, ab eventu tamen contrario edocti, quod minus provide fuerit festinatum, ne videamur dare causam dampnis tam irrecuperabilibus utriusque loci, unionem revocamus et dissolvimus volentes, ut per se uterque locus consistat deinceps sicut ante unionem et nullum decetero ad se respectum habeant alternatim ea provisioni divine singulariter commendantes quemadmodum in sui fundatione primitiva fuerant commendata. Acta anno incarnationis Mo CCo Lo indictione VIIa. Datum Tispach XVIo kalendas Iunii, pontificatus nostri anno IIIIo.

Source Fulltext: König, Stefan, Die älteren Urkunden des St. Katharinenspitals in Regensburg (2003), Nr. 48, S. 174 - 175.