In nomine sancte et indiuidue trinitatis amen. Testamentum suum non recte facit, qui terrenis tantum heredibus :׀ testatur et non facit Christum sue substancie coeredem. Sciant ergo presentes ac posteri, quod ego Perwinus in salutem anime mee et pro remedio patris ac matris mee et Christine quondam uxoris mee omniumque parentum sev benefactorum meorum ordinaui de cellario meo sub domo mea ex parte domus Lautwini dicti vel dari post obitum meum singulis annis in perpetuum in aniuersario meo libram denariorum sub hac forma: sexaginta denarii dentur canonicis ueteris capelle ad uigiliarum et missarum pro defunctis celebrationem, sacerdoti missam celebranti duo denarii, scolari ministranti unus denarius, pro candelis tres denarii, que sub ipsa missa accendantur, eclesiastico bis compulsanti duo denarii, plebano sancti Chassiani LII denarii pro totidem missarum celebracione singulis annis in requiem omnium fidelium defunctorum. Item ad ospitale trans pontem situm possessor predicte domus ac cellarii cum reliqua dimidia libra emat uictualia, prout melius uiderit competere egrotancium reformacioni eodem die singlis infirmis per se distribuere non obmittat. Et ut hoc ratum et firmum permaneat, presensque scriptum appensione sigilli mei roboraui. Huius testamenti tria paria feci: conscribi vnum ad hospitale, vnum ad veterem capellam, vnum ad sanctum Chassianum.