H(einricus) dei gratia prepositus cum universitate capituli maioris ecclesie Ratisp(onensis) universis prelatis, plebanis necnon et vicariis per Ratisponensem dyocesem constitutis ad quos littere iste pervenerint :I proficere in domino ad salutem. Litteras indulgentiarum per quas sancti patres nostri Gregorius, Innocentius quartus, summi pontifices Romane sedis et dominus Hugo tituli sancte Sabine presbyter cardinalis pauperibus Christi aput hospitale sancte Katherine in pede pontis Ratisponensis miserabiliter degentibus decreverunt misericorditer subvenire, quarum autentica per terras transferre singulis vicibus periculosum foret. In presenti membrana conscribi fecimus de verbo ad verbum vobis omnibus et singulis ab eorum nuntiis elemosinas petentibus ostendendam, ut sigillo nostro munita vos certificet, quod eadem autentica vidimus integra et salva in nulla sui parte nec in bulla, nec in filo, nec in littera viciatai, quorum primum hoc est. Gregorius episcopus servus servorum dei universis Christi fidelibus per Saltzpurgensem provinciam constitutis salutem et apostolicam benedictionem. Quoniam ut ait apostolus omnes stabimus ante tribunal Christi recepturi prout in corpore gessimus, sive bonum fuerit sive malum, oportet nos diem messionis extreme misericordie operibus prevenire ac eternorum intuitu seminare in terris, quod reddente domino cum multiplicato fructu recolligere debeamus in celis firmam spem fiduciamque tenentes, quoniam qui parce seminat, parce et metet, et qui seminat in benedictionibus de benedictionibus et metet vitam eternam. Cum itaque sicut accepimus, dilectis filliis magistro et fratribus hospitalis ecclesie sancte Katherine iuxta pontem Ratisponensem ordinis sancti Augustini ad consummationem ipsius hospitalis et ecclesie ac domorum eorum, que de novo construere inceperunt, ac ad sustentationem pauperum et infirmorum, quorum illuc non pauca confluit multitudo, proprie non suppetant facultates universitatem vestram rogamus, monemus et hortamur in domino in remissionem vobis peccaminum iniungentes quatenus de bonis a deo vobis collatis, pias eisdem elemosinas et grata caritatis subsidia erogetis, ut per subventionem vestram opus ipsum valeat consummari et vos per hec et alia bona, que domino inspirante feceritis ad eterne possitis felicitatis gaudia pervenire. Nos enim de omnipotentis dei misericordia et beatorum Petri et Pauli apostolorum eius auctoritate confisi omnibus vere penitentibus et confessis, qui ad dictum locum cum devotione accesserint vel de bonis sibi collatis a domino destinarint quadraginta dies de iniuncta sibi penitentia misericorditer relaxamus. Presentes autem mitti per questuarios a) firmiter inhibemus eas si secus actum fuerit carere iuribus decernentes. Dat. Lateran III. kl. Maii, pontificatus nostri anno XII. Innocentius episcopus servus servorum Dei universis Christi fidelibus per Ratisponen(sem), Saltzpurgen(sem) et Frisingen(sem) civitates et dyoceses constitutis salutem et apostolicam benedictionem. Quoniam, ut ait apostolus, omnes stabimus ante tribunal Christi recepturi prout in corpore gessimus, sive bonum fuerit, sive malum, oportet nos diem messionis extreme misericordie operibus prevenire ac eternorum intuitu seminare in terris, quod reddente domino cum multiplicato fructu recolligere debeamus in celis firmam spem fiduciamque tenentes, quoniam qui parce seminat, parce et metet, et qui seminat in benedictionibus de benedictionibus et metet vitam eternam. Cum igitur sicut dilecti filii, magister et fratres hospitalis sancte Katherine Ratisponensis sua nobis insinuatione monstrarunt ipsius hospitalis redditus et proventus adeo sint tenues et exiles, quod nec ipsi nec alii peregrinantes, pauperes et infirmi, quos in eodem hospitali frequenter intuitu caritatis recipiunt, ex ipsis valeant nisi per subventionem fidelium sustentari. Nos credentes animabus vestris fructuosum existere, si manum illis porrexeritis caritatis universitatem vestram rogamus, monemus et hortamur in domino vobis in remissionem peccaminum iniungentes, quatenus de bonis a deo vobis collatis pias elemosinas et grata eis caritatis subsidia erogetis, ut per subventionem vestram, tam ipsorum quam aliorum pauperum illuc confluentium inopie consulatur et vos per hec et alia bona, que domino inspirante feceritis ad eterne possitis felicitatis gaudia pervenire. Nos enim de omnipotentis dei misericordia et beatorum Petri et Pauli apostolorum eius auctoritate confisi omnibus vere penitentibus et confessis, qui eis manum porrexerint caritatis X dies de iniuncta sibi penitentia misericorditer relaxamus. Has autem litteras mitti per questuarios districtius inhibemus eas si secus actum fuerit carere iuribus decernentes. Dat. Lugdun. IIII. non. maii, pontificatus nostri anno tercio. Universis Christi fidelibus per Alamanniam constitutis ad quos presentes littere pervenerint. Frater Hugo miseratione divina tituli sancte Sabine prespiter cardinalis apostolice sedis legatus salutem in domino sempiternam. Quoniam ut ait apostolus omnes stabimus ante tribunal Christi recepturi prout in corpore gessimus, sive bonum fuerit sive malum, oportet nos diem messionis extreme misericordie operibus prevenire ac eternorum intuitu seminare in terris, quod reddente domino cum multiplicato fructu recolligere debeamus in celis firmam spem fiduciamque tenentes, quoniam qui parce seminat, parce et metet, et qui seminat in benedictionibus de benedictionibus et metet vitam eternam. Cum igitur sicut dilectus in Christo . . provisor hospitalis Ratisponensis nobis intimare curavit, idem hospitale ipsum edificare ceperit, opere sumptuoso nec ad consummationem huiusmodi et ad sustentationem pauperum ad illud confluentium proprie sibi suppetant facultates universitatem vestram rogamus, monemus et hortamur in domino atque in remissionem vobis iniungimus peccatorum quatenus de bonis vobis a deo collatis, pias ad id elemosinas et grata ei caritatis subsidia erogetis ut per subventionem vestram dictum opus consummari valeat et alias eorundem pauperum indigentie provideri et vos per hec et alia bona, que domino inspirante feceritis ad eterne possitis felicitatis gaudia pervenire. Nos enim de omnipotentis dei misericordia et beatorum Petri et Pauli apostolorum eius auctoritate confisi omnibus vere penitentibus et confessis, qui ei ad id manum porrexerint adiutricem quadraginta dies de iniuncta sibi penitentia misericorditer relaxamus. Quas mitti per questuarios districtius inhibemus eas si secus actum fuerit carere viribus decernentes. Dat. Colonie XII. kl. januarii, pontificatus domini Innocentii pape quarti anno nono. Igitur pietatem omnium vestrum et singulorum monemus in domino et rogamus quatenus subditis vestris fidelibus Christi autentica prescripta quando vobis a petitoribus hospitalis fuerint assignata diligenter legatis et exponatis fideliter et indulgentias, quas continent recitetis et frequentius inculcetis, ut spem de indulgentiis firmam concipientes devotius et libentius assurgant ad elemosinarum suarum beneficia pauperibus largienda tanto fiducialius instantes, quo certius pro vestra sollicitudine una cum largitoribus percipietis premia sempiterna. Dat. Ratisp(one) VIIIo kl. septembris, anno domini Mo CCo LVIIIo.