Alexander episcopus servus servorum Dei dilectis filiis .. magistro et fratribus hospitalis sancte Katerine in pede pontis :I Ratisponen(sis) salutem et apostolicam benedictionem. Licet is de cuius munere venit ut sibi a fidelibus suis digne ac laudabiliter serviatur de habundantia pietatis sue, que merita supplicum excedit et vota bene servientibus multo maiora retribuat quam valeant promereri nichilominus tamen desiderantes reddere domino populum acceptabilem, fideles Christi ad complacendum ei quasi quibusdam illectivis, muneribus, indulgentiis scilicet et remissionibus invitamus, ut exinde reddantur divine gratie aptiores. Cupientes igitur, ut ecclesia vestra, que in honore beate Katerine ut dicitur est constructa congruis honoribus frequentetur, omnibus vere penitentibus et confessis, qui ecclesiam ipsam in festo ipsius sancte annis singulis cum devotione ac reverentia visitarint de omnipotentis Dei misericordia et beatorum Petri et Pauli apostolorum eius auctoritate confisi quadraginta dies de iniuncta sibi penitentia misericorditer relaxamus. Dat. Anagnie kl. marcii, pontificatus nostri anno quinto.