Anshelmus dei gratia episcopus Warmien(sis) per Bohemiam et Morauiam necnon per Rigensem, Gnesenensem et Salz- :I burgensem provincias apostolice sedis legatus universis Christi fidelibus per Ratispon(ensem) dyocesim constitutis salutem in domino sempiternam. Quoniam, ut ait apostolus, omnes stabimus ante tribunal Christi recepturi prout in corpore gessimus, sive bonum fuerit sive malum, oportet nos diem messionis extreme misericordie operibus prevenire ac eternorum intuitu seminare in terris, quod reddente domino cum multiplicato fructu recolligere debeamus in celis firmam spem fiduciamque tenentes, quoniam qui parce seminat, parce et metet, et qui seminat in benedictionibus de benedictionibus et metet vitam eternam. Cum igitur infirmis et egenis hospitalis sancte Katerine in pede pontis Ratispone ad sustentacionem eorum proprie non suppetant facultates universitatem vestram rogamus et hortamur in domino in remissionem vobis peccaminum iniungentes, quatenus de bonis a deo vobis collatis pias eis ad hoc elemosinas et gratia karitatis subsidia erogetis, ut per subvencionem nostram dicti infirmi et egeni sustentari valeant et vos per hec et alia bona, que domino inspirante feceritis ad eternae possitis felicitatis gaudia pervenire. Nos enim de omnipotentis dei misericordia et beatorum Petri et Pauli apostolorum eius auctoritate confisi omnibus vere penitentibus et confessis, qui eis ad hoc manum porrexerint adiutricem, quadraginta dies de iniuncta sibi penitencia misericorditer relaxamus. Presentes vero litteras per questuarios mitti districtius inhibemus eas, si secus actum fuerit, carere viribus decernentes. Dat. Ratispone anno domini Mo CCo sexagesimo secundo XIIII. kal. septembris.