Ich Vlrich der Speyser auz der Ernawe vergich an disem brief vnd tvn allen den chunt, die den brief ansehent :I oder h/orent lesen, daz ich einen hof datz Ebenhausen, den ich vnd min brůder Heinrich chauften ze rehtem aigen von Chayshamern, verchaufte han dem spital hincz Regenspurch mit allem dem daz darzvgeh/ort, besůchtes vnd vmbesůchtes, geb^owen vnd vngeb^owen, ze dorfe, ze velde, ze holcze vnd ze wismade vmb eines vnd sehczich pfunt Regenspurger pfenninge, vnd ich sol im auch dazselbe gůt gestætigen, versprechen vnd rehtvertigen als des landes reht ist, swa oder an swiu ez dem vorgenantem spital ze chriech wirte, vnd dar/uber han ich dem vorgeschriben spital ze Regenspurch die b/urgen geseczet, die hinnach geschriben stent an dem brief vnd auch desselben veriehent als hernach geschriben stet. Wir Friderich von Tanne, Marquart Holczheimaer , Eberhart von Erlach, Seyfrit W/ilant vnd Albreht Speyser, veriehen auch an disem brief, daz wir des vorgenanten Vlrich des Speysers b/urgen sein, vmb die stætigunge des houes dacz Ebenhausen, den er dem spital ze Regenspurch hat verchaufte, daz wir im den vnuerscheidenlichen rehtuertigen s/vln vnd stætigen als des landes reht ist. Vnd geben im dar/vber den brief ze einer vrch/unde mit den Insigeln versigelt vnd geheln auch alle f/vmfe an div driv insigel, wan wir s/vmlich selber niht aygner insigel heten. Der taidingen sint auch geziuge: her Heinr(ich), der do verwesær waz der pfarre ze Ingoltstat; Læutwin der rihter; Otte der m/vnzmaister; Chunr(ad) Pfæffel; Vlr(ich) Wilde; Heinr(ich) Percheimer; Chunr(ad) Boytir vnd Chunr(ad) der Percheimer, des Wilden aydem, vnd ander bidewer læute vil. Daz ist geschehen dacz Ingoltstat, da von Christes geb/urde warn tausent jar, zwaihundert jar vnd in dem sehsten vnd siwnczigistem jar an dem heiligem auferttag vnsers herren Jesu xpi.