Ich Seifride von T/omlingen vergich an disem brief vnd tvn allen den chunt, die in ansehent :I oder h/orent lesen, daz ich einen hof dacz T/omlingen, den Osterhouen, der min rehtes aygen waz mit allem dem daz darzv geh/oret, besuchtes vnd vmbesůchtes, ze dorfe vnd ze velde vnd ze holcze, verchaufte han dem spital ze Regenspurch vmb einesvndzwainczke pfunt vnd drisich pfenninge Regenspurger vnd schol im denselben hove gestætigen, versprechen vnd rehtuertigen als des landes rehte ist, an swiu ez dem vorgenantem spital ze chriech wirte, vnd han im dar/vber ze b/urgen geseczte: Læutwinen, den richter ze Ingolestat vnd Chunraden, den Percheimer sinen brůder, die auch des veriehent veri als hinnach geschriben stet an disem brief. Wir Læutwin, der rihter von Ingolestat vnd Chunrat, der Percheimer sin brůder, veriehen an disem brief, daz wir b/urgen sin des vorgenanten Seifrides vmb die stætigunge des houes dacz T/omlingen, den er dem vorgenantem spital ze Regenspurch verchaufte hat, daz wir im den vnuerscheidenlichen gestætigen vnd rehtuertigen s/vln, als des landes reht ist. Vnd geben im dar/vber ze einer vrch/vnde disen brief mit des vorgenanten Læutwines, des richters vnd mit Chunrades des Pfæfflines, die des chaufes taidinger warn, insigeln versigelt. Des sint auch geziuge: Otte der m/vnzmaister, Vlrich Zwigel, Wernhart der Pekke, Chunrad der Percheimer vnd Hiltbrant von Chesschingen, Herman der Maier vnd ander bidewer læut vil. Daz ist geschehen do von Christes geb/urtte warn tausent jar zwaihundert jar vnd in dem sæhczkem vnd nivnczkistem jar des næhsten svnnetag vor vnsers herren aufertag.