Ich Chvnrat der alt von Pavlstorf tvn chvnt allen den, die div hantveste lesent oder h/orent, daz ich minen hof datz T/ondorf, :I der mir da ledich ist vnd ein pfvnt pfenninge giltte, Regenspurgeir die ze der z/it gib vnd gæb sint vnd vier schaf roken T/ondorffeir målzes alle iår mit g/vtem willen vnd r/ot miner havsvr/oven vern Angnesen vnd aller miner erben, dem spital ze Regenspurch an der pr/vke, vrielich fivr rehtes aygen gegeben han durch haile vnd willen miner sel, mit sogetåner beschaydenhayt, daz der maister von dem spital, swer ze der ziet maister sie, bei vns baiden lebentigen, min vnd miner håvsvr/oven, vnd nåh vnserm t/ode gewalt hab ze stiften vnd zen stiften vnd ovch daz der maister dez vorgenanten spitales von Regenspurch daz pfvnt pfenninge, daz der vorgenant hof gilltt, halbes geb alle iår bei vns lebentigen avf div sihstuben den s/ichen zv ainem gelæb dvrch ein vrchivnd des g/vtes, daz ander halpfvnt sol min havsvr/ove ver Angnes enpfohen biz an iren t/ode. Noh miner havsvr/oven t/ode sol der maister von dem spital daz vorgenant pfvnt pfenninge gar geben vf die sihst/vben vnd schivlen der maister vnd die brivder datz dem spital von den pfenninge min vnd miner havsvr/oven sel, ver Angnesen, gedenchen alle iår mit der iarz/it vnd schivlen avch n/oh miner havsvroven t/ode, vern Angnesen, der maister vnd die brivder von dem spital alle iar enpfohen div vier schaf chorens des m/olzel vnd der hof gillt ze T/ondorf vnd schivlen der zwai geben ze Pivlenhoven ain schaf, T/ondorffeir schaffe, in daz s/ihenhavs daz ander miner havsvr/oven swester ze Pivlenhofen biz an iren t/ode; nah irem t/ode fivr was dem convent ze Pivlenhofen, daz dritte schaf schivlen sie geben minen t/ohtern ze Pettendorf biz an ir ende hin, nah irem t/ode der sammenvnge ze Pettendorf ewichliech, daz vierde schaf schivlen sie alle iar geben zv dem werche vf daz t*vme, an alle widerred; ist aver daz, daz der vorgenant hof ze T/ondorf von schavre, von pisezze, von vrlivg der givllte niht vertragen mach vnd von chainerlay gemainem bresten, so schol der taile gevallen hincz Pivlenhoven, hincz Petendorf vnd vf daz t*vm, darnach vnd div givllt sei, swelhes iares der mayster vnd die brivder datz dem spital daz gvt von dem hof niht geben als der brif sait, so schol daz pfvnt pfenning daz der hof gillt, desselben iars geh/oren hincz Pivlenhoven vnd avf daz tvm. Daz disiv red stæt beleib darvmb han ich, Chvnrat der alt von Pavlsdorf, disen brif gestætigt mit minem insigel, da sint gezivge: her Chvnrat von Erenvels, her Heinrich der ivnge Pavlsdorffeir, Hartlib der probst von Affallterbach, Gebhart von R/vkolding, Rvpreht der Amman, brvder Chvnrat der maister, bruder Ortwein vnd ander biderb levt. Daz ist geschehen nach vnsers herren gebvrt tavsent iar zwaihvndert iar in dem sehsvndnivnzkistem iar an sand Marien Magdalen tag.