Ich Hans der Perhart vnd ich Ch/vnr/at St/ochkel sein bruder, vnser hawsfravn vnd all vnser :I erben, bechennen offenleich mit dem brief allen den, die in ansehent, h/orent oder lesent, daz wir vns liepleich vericht, veraint vnd verteidingt haben auf ein gantz entt mit dem geistleichen vnd erwirdigen herren, hern Chunraden dem Forchtman, an der zeit maister dez spitals sand Kathrein, an dem fuezz der pruchk zu Regenspurk, vnd mit der gemain der samung doselben vmb all zuspr/uch, voder/ung vnd handlung, die wir gehabt haben hintz dem vorgenanten spital vnd hintz den armen durftigen dezselben spitals von ires aigen weingarten wegen, genantt der Sant, der da liget gegen vnser lieben frawn zu Saler vber, darauf wir weinzurl recht vnser lebtag gehabt wolden haben vnd auch etwew vil daran gearbaitt haten, vmb ein sogetan gut, daran vns recht wol wen/ongt hat vnd dez wir in auch trewleich zu danchken haben, also mit der weschaiden, daz wir noch all vnser erben vnd nachk/omen chain ansprach noch vodrung hintz dem obgenanten spital von dez vorgeschriben weingarten wegen furbaz icht mer haben noch gewinnen in dhainerlay weis, an gev/ar. Vnd ob wir oder anders yemant von vnsern wegen mit dem vorgenanten spital oder mit der sammpung dezselben spitals, oder mit anders iemant von iren twegen kriegten oder rechten, ez war mit geistleichem oder wertleichem rechten, oder an recht, daz geb wir in zu aller stund vnd an aller stat gew/unnen vnd wehabt, vnd vns verloren. Vnd dez zu einen waren vrchund vnd zu einer merern sicherhait, geben wir in den brief versigelten mit dez erbergen herren, heren Vlreichen dez Hofmaisters zu Wintzer insigel, an der zeit richt/ar der vorstat zu Regenspurchk, der daz durch vnser fleissigen pet willen an den prief gehangen hat, im vnd seien erben vnd nachchomen vnengolten vnd an schaden. Der sach sind teidinger gewesen, die erbergen herren: Hainreich Snoper, burger zu Regenspurk vnd Fridreich der Senft, vnd Wernher der Neidechk/ar, ped gesessen an dem Stainbeg, gesworn dez hofs der vorstat zu Regensp/urk vnd ander erberger lewt gen/unchk. Daz ist geschehen nach Cristi gepurt drewtzehenh/undert iar vnd darnach in dem sibenvndnewntzigisten iar an sand Margreten tag der heiligen junchkfravn vnd martr/arung.