Ich Jorg der Neithart zu R/uchofen, mein hawsfraw vnd all vnser erben, bechennen offenleich an dem brief :I allen den, die in horent, sehent oder lesent, daz wir mit dem ersamen, weschaiden Liebharten dem Pretpechken, an der zeit maister dez spitals sand Kathrein, an dem f/uss der prukk zu Regenspurkch, vnd gemainkleich mit der samung dez conventz doselben, nach erwerger lewt rat vnd haissen, verricht, veraint vnd verteidingt worden sein auf ein gantz end vmb all zuspr/uch, vodrung vnd handlung, die wir gehabt haben hintz dem vorgenanten spital zu Regenspurchk, von der hub wegen die dy armen durftigen in dem vorgenanten spital da ligent haben, vmb ein sogetane/w svm geltz, dez vns recht wol wenougt vnd dez wir in auch trewleichen zu danchen haben, also mit der weschaiden, daz all zuspr/uch, vodrung vnd handlung, gar vnd gantz, ab vnd hin sein, wie sich die verlossen vnd ergangen haben, vntz auf den tag alz der brief geben ist. Vnd daz wir noch all vnser erben vnd nachchvmen chain ansprach, vodrung noch handl/ung hintz dem egenanten spital noch hintz dez spitals lewten vnd guten, wo ez die ligent hat von der vorgenanten hub wegen nicht mer haben noch gewinnen sullen, noch m/ugen, in dhainerlay weis, an gev/ar; vnd ob wir oder ander iemant von vnsern wegen darvber mit in kriegten oder rechten, ez war mit geistleichem oder wertleichem rechten, oder an recht, daz geb wir in an aller stat wehabt vnd gew/unnen, vnd vns verloren. Dez zu einen waren vrchund vnd zu einer merern sicherhait, geben wir in den brief versigelten mit dez erwergen herren, hern Hannsen dez Hillprantz insigel, an der zeit herr vnd richter zu Ruchofen, der daz durch vnser fleissigen pet willen an disen brief gehangen hat, im vnd seinen erben vnengollden vnd an schaden. Der sach sind teidinger gewesen, die erwergen herren: her Chvnrat Forchtman, korherr zu sand Johans vnd weilent sp(i)talmaister dez vorgenanten spitals zu Regenspurk, Vlreich der Kuttenawerar vnd Albrecht der Olthaimar, ped meiner herren dienar zu Regenspurchk, vnd Chunr(at) der Gerolt, zu denselben zeiten richt/ar zu Mangolting, Vlreich der K/vmchk, dez spitals mair zu dem Hochenperg, Chunrad dez Denklingers, mair zu Denkling vnd Perchtold der Ruchofar doselben, vnd ander erwerger lewt ein michel tail. Daz ist geschehen nach Cristi gepurtt drewtzehenhundert iar vnd darnach in dem sibenvndnewtzigistem jar an sand Alexins tag dez wirdigen heiligen.