Ich R/uger der Walach ze Ch/arrein, mein hawsfraw vnd all vnser erben, veriehen vnd tun chunt allen den, di den brif ansehent :I oder h/ornt lesen, daz vns her Fridreich der Slaikch, zu den zeiten maister dez spitals sand Katrein, an dem fuzz der prukk ze Regens(purch), vnd gemainleich di sammung doselben von iren genaden lazzen habent, iren vnd irs spitals aigen, ledigen weingartten, der gelegen ist gegen Saler /vber an dem Santt, von liechtmess, di nochst hin ist, /vber sechs ganczew jar, di nochst nacheinander chomment, daz wir denselben weingartten f/uderleichen vnd trewleichen, pa/wleich vnd wesenleich halten, pa*wen vnd arbaiten vnd verwesen s/ullen mit allew dew vnd darzu geh/ort, on allen iren schaden. Wir s/ullen in auch jarleich von irem vorgenanten weingartten geben vorauz von geleichem tail zwen emer weins vnd darnach s/ullen wir in ye den dritten emer geben, vnd sch/ullen vns ye di zwen emer beleiben, als vil dez weins wirt, on geu/ar; darzu s/ullen wir in auch allew jar j/arleich geben einen hengelp/uschel vnd darzu allen den hoppfen, der vns j/arleichen wirt, geleich halben. Wir s/ullen auch si vnsern tail dez hoppfen anpieten vnd ze chauffen geben vor andern la/uten. Wir haben in auch gehaizzen vnd gelobt, mit vnsern trewn, daz wir in allew jar j/arleichen tausent guter stokch in den vorgenanten weingartten schiezzen s/ullen; vnd s/ullen di p/osen stokch darauz ra*wmen vnd gut ertreich darein tragen nach dez weingarten notd/urfft. Wir s/ullen auch j/arleich in ir stift chommen vnd irer stift recht tun on all widerred, si s/ullen vns auch j/arleichen acht fuder mistez geben vnd f/uren zu dem vorgenanten weingartten, vnd wann wir den hoppfen ra/utten, so sollen si vns geben zway fuder mistez vnd s/ullen vns geben ayn pfunt hopfstang. Vnd wann di vorgenanten sechs jar auz chomment vnd vergangen sind, so s/ullen wir in den vorgenanten weingartten vnd waz darzu geh/ort, pa/wleich vnd wesenleich, ligen lazzen vnd ledichleich davon varen, daz si iren vorgenanten weingartten f/urbaz lazzen m/ugen, wem si wellent, als verre, daz wir vmb pawrecht noch vmb dhainerlai sach hintz in noch hintz irem weingartten dhain ansprach noch vodrung nicht mer haben noch gewynnen s/ullen, noch enm/ugen, weder mit gaistleichem noch werltleichem rechten, noch on recht, chlain noch groz, noch anders yemant von vnsern wegen. Vnd darvmb zu einer pezzern sicherhait, haben wir in zusampt vns vnuerschaidenleich ze porgen gesetzzt, vnser lieb pr/uder, Vlreich vnd Hainreich di Walach, Chunraden den Chna/wzzel vnd Chunraden den Gaizzh/ul/ar, all ze Ch/arrein, mit der beschaiden, ob wir nicht gut pawla/ut w/aren, vnd in vnd irem spital nicht allez daz st/at hielten vnd volfurten, waz an dem brif verschriben ist, welhen schaden si dez nemment, den si gesprechen m/ugen bei iren trewn, on ayd vnd on allew beredn/uzz; denselben schaden allen, s/ullen wir vnd di vorgenanten porgen in ab tun vnd widerchern, vnd si s/ullen vnd m/ugen auch dez allez, an aller stat, von vns vnd von den vorgenanten porgen, vnd von aller vnsrer hab, besuchtt vnd vnbesuchtt bechommen, mit gaistleichem oder werltleichem rechten, wann vnd wie si wellent. Vnd ob wir oder vnser porgen dar/vber mit in chriegten oder rechten, daz s/ullen si allez behabt haben, vnd wir vnd vnser porgen verlorn haben. Daz in daz allez also st/at vnd vnzebrochen beleib, dar/vber zu einem vrchund, geben wir in den brif versigelten mit herren Wernten dez S/alrer, zu den zeiten richter in der vorstat zu Regens(purch), insigel, daz er an den brif gelegt hat nach vnser aller vleizzen pet, der sach zu einer gezeukchn/uzz, inn vnenkolten vnd on schaden der herren vogtey vnd stewr, darvnder wir vns vnd vnser porgen, all vnuerschaidenlich verpinden, mit vnsern trewn stet ze halten, waz an dem brif verschriben ist. Daz ist geschehen nach Cristi gepurtt drewtzehenhundert jar vnd in dem viervndsibentzgisten jar dez nochsten eritagz vor pfingstey.