Ich Vlrich der Wagner czu Walting, ich Christein sein hausfraw, vnsrer br/uder, erben vnd nachchomen, wir veriehen offenlich :I mit dem brif allen den, die in ansehent oder horent lesen, die nu lebent vnd hernach chunftig sind, das wir ch/afleich zu chauffen haben gegeben vnd verchauft haben das spitallehen zu Walting, zu veld vnd zu dorf, wismad vnd akker, gestift vnd vngestift, vers/ucht vnd vnuers/ucht, wie so das genant ist, nichcz auzgenom , dem erberigen mann Dyetlein dem H/aberlein, gesezzen zu Walting, innen, seiner hausfrawn, ir bayder erben vnd nachchommen, vnd das allez zu lehen ist von dem spital zu Regensp/urkch, vmb funthalbz phunt phening vnd vmb zwelif pfening, allez samder Regenspurger phening, der wir gar vnd gancz gericht vnd gewert sein, an all vnsrer sch/aden, zu rechter weil vnd zeit. Sy mugen auch f/urbacz mit deur obgenanten (sp ?) g/ut t/un vnd schaffen, was sy wellent, an all vnsrer vnd aller manichleich irrung vnd hindernuzz, vnd schullen auch vnd wellen in das obgenant g/ut versten vnd versprechen f/ur all chrieg, ansprach, irsal vnd ynuell, an allen irn schaden, alz oft vnd all vil g/an wem in sein nott geschiecht. Wir verczeichen auch vns, ich obgenanter Vlrich, mein hausfraw, vnsrer erben vnd nachchommen, des obgenanten g/utz mit allem cz/ugehorn, gar vnd gancz mit dem brif, daz wir noch anders ymant von vnsrern wegen chain ansprach noch vodrung darnach nymer mer gehaben noch gewinnen schullen, wellen noch enmogen, weder mit recht noch an recht, geistleichem oder weltleichem, in chainer weis noch mit chainerlay sach, wie man dye erdenkchen oder ervinden mocht, vnd wes wir oder andrers ymant von vnsrern wegen f/urbas mit yn darvber czu chrieg w/urden, vor geistleichem oder weltleichem rechten oder an recht, das habent sy an aller stat wehabt vnd wir g/an yn gancz vnd gar verlorn. Vnd der sach sind taidinger gewesen: Vlr(ich) der Groll vnd der Greymel, payd gesezzen czu Walting, vnd ander pyderb la/wt genueg, vnd die obgenanten taidinger sind auch czeugen, das wir vmb das sygel gepeten haben, vnd das yn das alles st/at vnd vnczeprochen weleib, darvber (?) geb wir yn den brif versygelten mit des erberigen, weisen mans sigel, Stephans des Swintpekchens czu Swintpach, darvnder wir vns verpinten mit vnsrern trewn alles das st/at czu haben, was oben an dem brif verschriben stet, ym vnd seinen erben vnd nachchommen an sch/aden vnd vnengolten. Vnd das ist geschehen do man czalt von Christes gep/urd drewczehenhundert jar darnach in dem newnvndnewtzkisten jar des phincztags vor sand Larenczen tag des heiligen martrers.