Wir Conrat von gotes genanden probst dez gotzhauss zu sand Mang vnd gemainklich der conuent daselben, bekennen offenlich :I mit dem brief, das wir ain vnser aigen fleischpankch, gelegen zu Regens(purch) vnder den fleischtischen mit sambt der hofstat darvnder, vnd dyselb fleischpankch hat nach der weit in dem liecht na/wn sch/uch der stat mazz vnd ligt zwischen des Zirkkendorffer pankch vnd Anndre dez Ludel pankch, recht vnd redlich lassen haben zu rechtem leibting, Conrat dem S/appel, Dietreich vnd Nikel den S/appel seinen s/vnn, zu ir drein leiben fridleich vnd freileich ze besitzzen, ze niezzen vnd ze n/utzzen ir lebtag nach leibtings recht, mit der beschaiden, das di obgenanten drei leib in der gemain oder in der besunder vns vnd vnserm gotzhaus alle iar i/arlich davon zu zins geben sullen vierzik Regenspurger pfenning, ie an sand Haymerams abent oder an seinen tag, alle iar g/ut pfenning Regenspurger mvnnzz, di dann gib vnd g/ab sind. Vnd welhes iares si vns denselben zins vers/azzen, darnach di nahsten acht tag, so sullen si vns denselben zins ie desselben iars geben mit der zwispild nach der stat purkrecht zu Regens(purch), vnd ob si vns di zwispild auch vers/azzen, welhen schaden wir dez allez nemmen, des sullen vnd mugen wir mit sambt dem zins vnd der zwispild von in vnd von aller irer hab bechomen mit dem rechten, wan vnd wie wir wellen. Es ist auch geredt worden, daz die obgenanten drey leib ir lebtag dhainen gewalt habent, di vorgenant fleischpankch vmb den zins auf ze sagen, wann man vns vor i/arlich davon geben hat sechzikch pfenning, vnd wir haben in den zins geringert, darvmb daz er vns hinfur von in dester gewisser sei. Si sullen auch di vorgenanten fleischpankch ir lebtag pa/wlich vnd wesenlichen halten, vnd mit schaczstewer vnd mit allen sachen ausrichten, wann waz darauf gelegt w/ar oder w/urd von der stat vnd den burgern zu Regens(purch) oder von iren ambtla/wten, oder von wem daz w/ar, dez allez sullen wir vnd vnser gotzhaus vnenkolten sein vnd beleiben an vnserm vorgenanten zins, wann si vns den i/arlichen geben sullen, on allen abgankch vnd on allen chrieg vnd widerred, daz si dez dhainerlai sach noch geprest nicht sol irren vnd wann die obgenanten drei leib all nicht mer ensind vnd von todes wegen abgend, so ist vns vnd vnserm gotzhaus vnser vorgenanten fleischpankch mit allem paw vnd pesserung, di si daran getan habent ze durchslecht ledig vnd los worden, on all ansprach vnd widerred, das den obgenanten dreyn leiben oder wer den brief von iren wegen ir lebtag ynn hat vnd furbringt. Daz allez also st/at vnd vntzebrochen beleib, daruber zu vrchvnd geben wir in den brief besigelten mit vnserm insigel fur vns vnd fur vnser nachkomen st/at zu halten waz an dem brief verschriben ist. Der sach sind gezewg: her Lienhart vnser conuent bruder zu sand Mang, Dietreich der prew vnd Jacob der Dechpeter. Daz ist geschehen nach Christi gep/urtt drewzehenhvndert jar vnd in dem na/wnvndnewntzigistem iar dez nahsten montags nach sand Veitz tag dez heiligen martrer.